Stýdenttermen, ata-analarmen jáne oqytýshylarmen onlaın-kezdesýde Abaı atyndaǵy QazUPÝ rektory Takır Balyqbaev tótenshe jaǵdaıǵa baılanysty jáne úkimet indettiń taralýyn boldyrmaý úshin qajetti sharalar qabyldaǵanyn atap ótti.
Rektor @abai_university Instagram paraqshasynda tikeleı efırde ótken kezdesýde ýnıversıtette jasalyp jatqan jumystar barysyna toqtaldy. Qazirgi kezde mańyzdy is-sharalardyń biri – qashyqtan oqý. Osy oraıda rektor bilim berý úrdisindegi qashyqtan oqytý máseleleri, emtıhandardyń merzimderi men sharttary, oqý barysynda jasalatyn jeńildikter, dıssertasııalar, taǵlymdamalarǵa qatysty suraqtarǵa jaýap berdi.
Ýnıversıtet rektory T.Balyqbaev atap ótkenindeı, 16 naýryzdan bastap tolyǵymen qashyqtan oqýǵa kóshken oqý ornynyń jataqhanada turatyn stýdentteri úılerine oraldy. Jataqhanada 47 sheteldik stýdent turyp jatyr. Qashyqtan bilim berý úderisinde «Univer», «Moodle» júıeleri jáne basqa da aqparattyq-kommýnıkasııalyq tehnologııalar qoldanylýda. Oqý kezinde oqytýshylar men stýdentterde birqatar qıyndyqtar týyndaǵany belgili. Birinshiden, oqytýshylar úshin qashyqtan oqytý tájirıbesiniń jetispeýshiligi. Máseleni sheshý úshin ýnıversıtette qashyqtan oqytýǵa kóshý boıynsha daıyndyq jumystary júrgizildi. Qashyqtan oqytý platformalary boıynsha onlaın-vebınarlar uıymdastyrylyp, onlaın-oqytý boıynsha kezeń-kezeńimen nusqaýlyqtar berildi, túsindirý jumystary júrgizildi. Qazirgi ýaqytta oqytýshylar jumystyń ońtaıly jáne alýan túrlerin (vıdeo sabaq, ózindik jumys, onlaın kýrstar) qol jetimdi aqparattyq-kommýnıkasııalyq tehnologııalardy (WhatsApp jáne Telegram, Zoom, Moodle, skaıp, elektrondy poshta jáne t.b.) qoldaný arqyly daǵdylaryn qalyptastyrýda. Sonymen qatar oqytýshylar qaǵaz bastylyq pen eseptik júktemelerden bosatylǵan. Ekinshiden, aýyldyq jerlerde turatyn stýdentterdi ınternet jáne tehnıkalyq quraldarmen qamtamasyz etý máseleleri jeke qarastyrylyp, barynsha jaǵdaı jasalýda.
Jazǵy sessııada emtıhandar «Proctoring» júıesinde onlaın-test túrinde (testileýdi onlaın rejıminde basqarý) ótetin bolady. Emtıhandy kompıýter, noýtbýk, smartfon arqyly da tapsyrýǵa bolady. Qazir bul júıe synaqtan ótýde. Onlaın-testileý boıynsha aqparat (nusqaýlyq) saıtta usynylady. Shyǵarmashylyq pánder boıynsha emtıhandar jáne dıssertasııalardy qorǵaý beınekonferensııa formatynda platformalar arqyly ótedi. Dıplomdyq jumystar plagıatqa tekseriledi, proktorıng qoldanylady. Qazirgi jaǵdaıǵa baılanysty oqý aqysyn mamyr aıynyń sońyna deıin shegerý týraly sheshim qabyldanǵan.
«Biz oqý jeńildikteri týraly ótinishterdi (belgilengen talaptarǵa sáıkes tıisti qujattar negizinde) qarastyramyz. Biraq munda ýnıversıtet óz kezeginde barlyq oqytýshylar men qyzmetkerlerdiń jumysyn tolyq kólemde jáne tıisinshe shyǵyndardy tólep jatqandyǵyn atap ótkim keledi. Ýnıversıtet tótenshe jaǵdaıǵa baılanysty qyzmetkerlerdi demalysqa jibermeı, tolyq jalaqy tóleýde. Al oqý jylynyń basynan bastap 1500 stýdentke jeńildikter (350 mıllıon teńgeden astam) jasaldy», - dep atap óttirektor.
Aıta ketý kerek, rektordyń basshylyǵymen oqytýshylar men bilim alýshylardyń TJ jaǵdaıynda qaýipsizdigin barynsha qoldaý jáne baqylaý, qashyqtan bilim berý úderisinde oqytý quraldarymen qamtamasyz etý maqsatynda arnaıy shtab quryldy. Qoldaý kórsetý maqsatynda shákirtaqy berilip, oqytýshylar men qyzmetkerlerge jalaqy tólendi.
Sonymen qatar ýnıversıtettiń barlyq ujymy «Biz birgemiz» jáne «Úıde bol» aksııalaryn qoldap, «Izgilik elshisi» eriktileri qaıyrymdylyq aksııalaryna qatysyp, az qamtylǵan otbasylarǵa zańgerlik kómek kórsetýde.