Qazaqstan men Túrkııa COVID-19 indetine qarsy bir-birine kómek kórsetýdi jalǵastyrýda. Túrkııalyq «Nobel İlaç» dári-dármek kompanııasy elimizge medısınalyq preparattar jiberdi.
Qazaqstannyń Túrkııadaǵy Elshiligi atsalysýymen senbi kúni Almaty áýejaıyna dári-dármekterden quralǵan jarty tonnalyq júk kelip tústi. Osy qıyn kezde túrik aǵaıyndardan kelip túsken dári-dármekter elimizdiń koronavırýsqa qarsy kúres júrgizip jatqan medısınalyq mekemelerinde qoldanylatyn bolady.
«Nobel İlaç» kompanııasynyń Basqarma tóraǵasy Hasan Ýlýsoı Qazaqstan Respýblıkasynyń Premer-Mınıstri Asqar Mamınge joldaǵan hatynda «Qazaqstan Elshiliginen alynǵan aqparatqa sáıkes elińizdiń keıbir dári-dármek qajettiligin bilgen kezde, dereý áreket ettik. Keıbireýlerin ózimiz óndirsek, keıbireýlerin basqa kompanııalardan aldyryp, naýqastardyń emdelýine septigin tıgizedi degen nıetpen Qazaqstan elshiligine joldadyq. Osynaý aýyrtpaly kezeńde eńserý úshin bir-birimizge barlyq máselelerde demeý bolý óte mańyzdy dep sanaımyz. Biz baýyrlas eki eldiń halyqtary men barlyq adamzat arasynda osy indettiń taralýy jaqyn arada toqtaýyn tileımiz. Qajet bolǵan jaǵdaıda ekinshi úıimiz sanalatyn baýyrlas Qazaqstanǵa árdaıym kómek kórsetýge daıynbyz» - dep atap ótti.
«Nobel İlaç» kompanııasy Túrkııa dári-dármek óndirisi naryǵynda kóshbasshy kompanııalardyń biri bolyp sanalady. 2004-shi jyly kompanııa Qazaqstanǵa ınvestısııa quıyp óz zaýytyn ashty. Qazirgi tańda kompanııanyń Qazaqstandaǵy fılıalynda 420 adam jumys isteýde, kompanııa Qazaqstanda 200-den asa dári-dármek túrin óndiredi. Kompanııanyń ónimderi kórshiles О́zbekstan, Mońǵolııaǵa, Reseı jáne Qyrǵyzstanǵa eksporttalady.