Qazir koronavırýs indetine baılanysty ár óńirde saqtyq sharalary barynsha kúsheıtilip, adamdar men kólik qozǵalysy shektelip tur. Biraq karantınnen keıin de ómir bar, shekteýler aıaqtalysymen san saladaǵy tirshilik qaıtadan qalypty arnasyn tabýy tıis. Sondyqtan da qara kúzde el nesibesiniń ortaımaýyn oılaǵan Syr dıqandary saqtyq sharalaryn barynsha kúsheıtip, kóktemgi egis naýqanyna shyqty.
Jalpy, ala jazdaı atyz basynda júretin dıqandardyń jyldaǵy alańy – sýdyń tolyq ári der kezinde jetýi bolatyn. Soǵan qosa eginge qam jasaǵan ár sharýanyń kóńil túkpirinde «Naýqan qarsańynda baǵasy myń qubylyp ketetin janarmaı jaıy qalaı bolar eken?..» degen kúdik te joq emes edi. Biraq Memleket basshysy tótenshe jaǵdaı men daǵdarysqa qarsy is-sharalar jónindegi málimdemesinde dıqandardy mazalaǵan osy máseleniń oń sheshiletinin aıtty. Prezıdenttiń Úkimetke aýyl sharýashylyǵy ónim óndirýshileri úshin dızel baǵasyn 165 teńgeden asyrmaýdy tapsyrǵany eńbekkerler úshin erekshe qoldaý boldy.
Qazir osy tapsyrma júzege asyp jatyr. Oblys dıqandaryna memleket tarapynan jeńildetilgen baǵamen bólingen dızeldi jetkizýshi operator bolyp «Nefttrans-Qyzylorda» JShS men «RK-Munaı» kompanııasy belgilenipti. Bul eki seriktestik oblystyq aýyl sharýashylyǵy usynatyn tapsyrysqa sáıkes, kúz ben kóktemgi naýqan kezinde dıqandarǵa 28 myń tonna dızel jetkizedi.
«Nefttrans-Qyzylorda» naýryz aıynyń basynda ǵana Shymkenttegi munaı óńdeý zaýytynan janarmaıdyń ár tonnasyn 194 myń teńgeden alyp, sharýalarǵa lıtrin 178 teńgeden jetkizgen. Al sáýir aıynan bastap zaýyt ónimi edáýir arzandap, tonnasy 174 teńge bolypty.
– Biz oǵan tasymaldaý shyǵyndaryn qosyp, lıtrin 162 teńgeden sharýashylyqqa jetkizemiz. Belgilengen keste boıynsha dıqandarǵa janarmaı ýaqtyly baryp tur, – deıdi «Nefttrans-Qyzylorda» JShS dırektory Nurymjan Sopbekov.
Munaı tasymaldaýshy kompanııa basshysynyń aıtýynsha, alda zaýyttaǵy baǵa túsip jatsa, aımaqqa jetetin dızel de arzandap otyrady.
Memlekettiń qoldaýyn sezinip, kóńildegi sekemi seıilgen sharýalar el nesibesin eseleýge kirisip ketti. Bıyl oblys boıynsha 183,1 myń gektarǵa egis egý mejelenip otyr. Negizgi daqyl kúrish kólemi 88 myń gektardan asady. Egistikke qajetti mıneraldyq tyńaıtqyshtar bar, tuqym da tolyǵymen jetedi.
Qyzylorda oblysy