Oblys ákimi Gúlshara Ábdiqalyqova epıdemıologııalyq ahýaly aýyr Jańaqorǵan jáne Shıeli aýdandaryna baryp, indettiń taralýyn tejeý baǵytyndaǵy jumystarmen tanysty.
Búginde oblys boıynsha COVID-19 ınfeksııasyn juqtyrǵan 151 adam bar. Solardyń 61-i Shıeli, al otyzy Jańaqorǵan aýdany turǵyndary.
Osy kúni Jańaqorǵan kentinde 4 sanıtarlyq tosqaýyl beketi jumys istep tur. Medısına, polısııa jáne ákimdik qyzmetkerleri táýlik boıy kezekshilikte. Turǵyndardyń júrip-turýyna qatań tyıym salynǵan. Qyzmetkerler ystyq tamaq jáne jeke qorǵanysh quraldarymen qamtamasyz etilgen.
Aýdanda vırýs juqtyrǵandar juqpaly aýrýlar aýrýhanasynda, al olarmen qarym-qatynasta bolǵandar Jańaqorǵan shıpajaıyna jatqyzylǵan. Qazir 80 adam dárigerler baqylaýynda. Kent ortalyǵyndaǵy 15 dúken, «Qazaqtelekom», «Kazposhta» ǵımarattary mańaıyna, naýqastar tirkelgen Álimkól, Aralbaev, Jeńis, Álshekeı kóshelerinde zalalsyzdandyrý jumystary júrgizildi. Jalpy kólemi 527 667 sharshymetr aýmaq dezınfeksııalandy.
Jasalyp jatqan jumyspen tanysqan aımaq basshysy aýdan ákimi Sultan Maqashovqa sanıtarlyq-epıdemıologııalyq jaǵdaıdy udaıy nazarda ustaýdy jáne karantın erejelerin múltiksiz oryndaýdy tapsyrdy.
Al Shıeli aýdany ortalyǵynda 11 sanıtarlyq beket jumys isteıdi.
Karantınge jabylǵan Qodamanov, Bala bı, Jıdeliaryq, Ortaqshyl eldi mekenderiniń turǵyndary jergilikti kásipkerler esebinen tegin azyq-túlik jáne medısınalyq buıymdarmen qamtamsyz etilýde.
Gúlshara Naýshaqyzy kenttegi ındýstrıaldy-agrarlyq kolledjinde ornalasqan provızorlyq stasıonardyń mamandarymen sóılesti. Dárigerler qajetti preparat jetkilikti ekenin, qorǵanysh kıimderimen qamtamasyz etilgenin aıtty.
Sonymen qatar, aımaq basshysy «Gejýba Shıeli sement» zaýytynyń jataqhanasynda ashylǵan ýaqytsha turaqtaý ornynyń jumysymen de tanysty. Aýdan ákimi Qambarbek Múbárakov munda dárigerlerdiń tynyǵyp, demalýyna bar jaǵdaı jasalǵanyn jetkizdi.
Oblys basshysy turǵyndarynyń kóbi vırýs juqtyrǵan Qodamanov aýylyna da bardy. Eldi meken tolyq oqshaýlanǵan. Aýyldan shyqqan 46 naýqas oblys ortalyǵyndaǵy juqpaly aýrýlar aýrýhanasynda em qabyldap jatyr. Aýyldy jáne tosqaýyl beketin tártip saqshylary men sarbazdar kúzetip júr. Aýdanǵa kelisimshart boıynsha jumys isteıtin 25 áskerı qyzmetker jiberilgen. Olardyń qataryna búgin aýmaqtyq qorǵanys brıgadasyn jasaqtaý maqsatynda arnaýly jıynǵa shaqyrtylǵan taǵy 25 áskerı mindetti sarbaz qosyldy.
–Biz úshin qazir eń bastysy – dendegen dertti toqtatý. Azyq-túlik, dári-dármek arnaıy kóliktermen jetkiziledi. Aýyldan eshkimdi shyǵarmaı, syrttan eshkimdi kirgizbeý kerek. Vırýs juqtyrǵan adamdardyń tezirek jazylyp shyǵýyna bar kúshti jumyldyramyz, – dedi oblys ákimi.
Aýdanda osy kúnge deıin 1 mln 262 myń sharshy metr aýmaq zalalsyzdandyrylyp, 28 mln teńgege antıseptık, hlor, qorǵanysh kıimderi jáne basqa da medısınalyq buıymdar satyp alynǵan.
Sapar qorytyndysynda Gúlshara Ábdiqalyqova aýdanda indettiń taralýyn boldyrmaý sharalaryn áli de shırata túsý kerektigin aıtty. Talaptardyń ýaqytyly oryndalmaýynyń saldarynan kópshilik sharalar ótkizilip, aýrýdyń jaıylyp ketýine jol berilgen. Aýdan basshylyǵy tez arada olqylyqtyń ornyn toltyryp, baqylaýdy bir sát te báseńsitpeýi kerek.