Memleket basshysy Nursultan Nazarbaev Memlekettik qyzmet isteri jónindegi agenttiktiń tóraǵasy Álıhan Baımenovti qabyldady, dep habarlady Prezıdenttiń baspasóz qyzmeti.
Memleket basshysy Nursultan Nazarbaev Memlekettik qyzmet isteri jónindegi agenttiktiń tóraǵasy Álıhan Baımenovti qabyldady, dep habarlady Prezıdenttiń baspasóz qyzmeti.
Kezdesý barysynda Á.Baımenov Memleket basshysyna agenttiktiń aldaǵy qyzmetiniń negizgi baǵyttary men halyqaralyq sarapshylar tarapynan joǵary baǵa alǵan memlekettik qyzmettiń qazaqstandyq modeliniń qalyptasqan aspektileri týraly baıandady.
Qazaqstan Prezıdenti memlekettik qyzmetti reformalaýdyń negizgi kezeńderiniń biri «A» korpýsyn jáne tıisti sapaly kadrlar rezervin jasaqtaý ekenin atap ótti.
– Osy oraıda memlekettik qyzmetshilerdi daıarlaý jáne biliktiligin arttyrý máselelerine nazar aýdarý qajet. Oblystarda onyń qyzmetine jetkilikti qadaǵalaý jasamaıtyn jergilikti ákimdikterge baǵynystaǵy memlekettik qyzmetshilerdi oqytýdyń óńirlik ortalyqtary bar. Nazar aýdarýdy talap etetin taǵy bir baǵyt – memlekettik qyzmetshilerdi shetelderde oqytý jáne biliktiligin arttyrý. Qajetti bilim qory, daıyndyqtary bar adamdardy jiberýdiń ornyna ol jaqqa kóbinese aǵylshyn tilin bilmeıtinder jiberiledi. Osynyń saldarynan olar materıaldy ıgere almaıdy jáne tıisti tájirıbe jınaqtaı almaıdy. Bul maqsattarǵa bıýdjetten 170 mln. teńge bólingen, al nátıje joq, – dedi Memleket basshysy.
Nursultan Nazarbaev tıisti mamandyqtar boıynsha daıarlaýda sapanyń qajettigin atap ótti.
– Búginde kóptegen joǵary oqý oryndarynda memlekettik basqarý jáne memlekettik qyzmetshilerdi daıarlaý fakýltetteri ashylýda. Alaıda olarda kóbinese ekonomıka men quqyq jónindegi pánder oqytylady, al is júzinde memlekettik qyzmet odan da aýqymdy máselelerdi bilýdi qajet etedi. Bul oraıda agenttik Bilim jáne ǵylym mınıstrligimen birlesip pysyqtap, jaǵdaıǵa taldaý jasaǵany jón, – dedi Qazaqstan Prezıdenti.
Memleket basshysy ortalyq pen jergilikti bılik arasynda memlekettik qyzmetshilerdi rotasııalaý jónindegi jumysty tıimdi júrgizýdiń mańyzdy ekenine nazar aýdardy.
– Bul – óte mańyzdy jáne jaqsy tájirıbe, óıtkeni, óńirlik sıpattaǵy máselelerdi bilmegen adam ortalyqta qalaısha jumys isteı alady? Biraq bılik kóbinese jergilikti daıyn kadrlardy tartý úshin tıisti jaǵdaı jasaýǵa múddeli emes. Bul úderisti jiti qadaǵalaǵan jón, – dedi Nursultan Nazarbaev.
Buǵan qosa, Qazaqstan Prezıdenti sońǵy ýaqytta óńirlik tártiptik keńesterdiń óz belsendiligin azaıtyp alǵanyn, olardyń jumysyn kúsheıtý jóninde sharalar qabyldaý qajettigin atap ótti.
О́z kezeginde Á.Baımenov Qazaqstan Prezıdentin memlekettik qyzmetti odan ári jańǵyrtý jáne saıası qyzmetshiler sanyn edáýir qysqartý jónindegi tapsyrmalarynyń oryndalýy týraly habardar etti.
– Qazaqstannyń memlekettik qyzmetiniń jańa modelin odan ári qalyptastyrý maqsatynda Zań, sondaı-aq, 12 Jarlyq jáne Úkimet pen agenttiktiń birqatar normatıvtik-quqyqtyq aktileri qabyldandy. Sizdiń nusqaýyńyzǵa sáıkes biz álemniń jetekshi elderiniń tájirıbelerine taldaý jasadyq jáne búginde halyqaralyq sarapshylardyń pikirinshe, Qazaqstanda ózindik biregeı memlekettik qyzmet modeli qalyptasty, – dedi agenttik tóraǵasy.
Kezdesý qorytyndysynda Memleket basshysy memlekettik qyzmet kórsetý jáne memlekettik apparat jumysynyń tıimdiligin arttyrý úshin memlekettik qyzmetshilerdi oqytý sapasyn jaqsartýǵa baılanysty birqatar naqty tapsyrmalar berdi.
-----------------------------------------
Sýretti túsirgender
S.BONDARENKO, B.OTARBAEV.