О́tken jyly elimizde ózenderdegi keme qatynasymen jasalǵan tasymaldyń jalpy kólemi 1,5 mln. tonnany qurasa, bıyl bul kórsetkishti 1,6 mln. tonnaǵa jetkizý josparlanyp otyr. Onyń 650 myń tonnasy Reseı baǵytynda tasymal jasaýy tıis. Bul týraly IIDM Baspasóz qyzmeti habarlady.
Jalpy navıgasııalyq maýsymnyń ashylýy sý joldarynyń ýchaskelerine baılanysty 1 sáýir men 12 mamyr aralyǵynda júrgiziledi. Osy maýsymdy ýaqytynda ashý úshin 2020 jylǵy 1-toqsanda daıyndyq jumystary jasaldy. Atap aıtqanda, 3814 navıgasııalyq belgi, 3 keme ótkizetin shlıýz jáne 147 tehnıkalyq flot kemesi ázirlenip, jóndeldi.
Qazaqstanda navıgasııalyq maýsym merzimi ortasha alǵanda 196 táýlikti quraıdy.
Elimizde ózenderdegi keme qatynasy Ertis, Oral-Kaspıı jáne Ile-Balqash basseınderinde júzege asyrylady. Búgingi tańda bul salada 14 myńǵa tarta adam eńbek etedi.
«Nurly jol» memlekettik baǵdarlamasy aıasynda keme ótkizetin shlıýzderdi kúrdeli jóndeý jumystary júrgizilýde. Bul shara apattar sany 10,3% azaıtýǵa jáne ótkizý qabiletin jylyna 350 kemege deıin jetkizýge múmkindik beredi.
Bıyl temir-beton qurylymdaryn (alańy 18 myń m2) jáne kótergish jabdyqtardy (6 birlik) jóndeý josparlanǵan. Shlıýzderdegi jumystar kúntizbelik jospar-kestege saı oryndalýda.
Budan basqa, 2025 jylǵa deıingi kezeńde baǵdarlama sheńberinde tehnıkalyq flottyń 42 kemesin jańartý kózdelip otyr, bul tehnıkalyq flottyń jalpy tozýyn 78%-dan 55%-ǵa deıin azaıtýǵa múmkindik beredi.