Atyraýlyq 11-synyp oqýshysy Eldar Qurmashev ózi iske qosqan KazMessage mobıldi qosymshasynyń avtorlyq quqyǵyn anasynyń atyna tirkedi. Avtorlyq quqyqty rastaıtyn kýálik 15 sáýirde berilgen.
Onyń aıtýynsha, bastapqyda avtorlyq quqyqty óz atyna tirkeýdi kózdegen. Alaıda, buǵan Eldarda elektrondy sıfrly qoltańbanyń bolmaýy kedergi keltirgen. Sol sebepten, avtorlyq quqyqty anasy Almagúl Qurmashevanyń atyna tirkeýine týra keldi.
– Avtorlyq quqyqty tirketý úshin halyqqa qyzmet kórsetý ortalyǵyna habarlastym. Ondaǵylar elektrondy sıfrly qoltańbanyń qajettigin aıtty. Biraq, dál qazir maǵan elektrondy sıfrly qoltańbany alý múmkin bolmaı tur. Sebebi, qazir bul ortalyq qashyqtan jumys isteý rejımine kóshken. Al, qoltańbany alý úshin kamera arqyly jeke kýálikti, ózińdi kórsetý kerek. Úıdegi kompıýterimde kamera bolmaǵandyqtan, ázirge avtorlyq quqyqty anamnyń atyna tirkeýge uıǵarym jasadym. Keıin karantın merzimi aıaqtalyp, bári qalpyna kelgen kezde óz atyma qaıta tirketýdi kózdep otyrmyn, - deıdi jas ónertapqysh Eldar Qurmashev.
Sáýirdiń 15-de Eldar Qurmashevtyń KazMessage mobıldi qosymshasyn iske qosqanyna 1 aı boldy. Ol 15 naýryzda mobıldi qosymshany Playmarket-ke engizgen edi. Sodan beri KazMessage-ni 2500 adam júktep alǵan. Onyń 2400-i – qazaqstandyq. Qazir jańa qosymshany 1500 adam belsendi qoldanyp júr.
– Statıstıkany kún saıyn qarap otyrmyn. Ásirese, óz otandastarymnyń qyzyǵýshylyq tanytqany qýantady. Jańa mobıldi qosymshany qoldanatyndardyń arasynda Qyrǵyzstan men О́zbekstannyń, Oman Sultanaty men Germanııa, Iordanııa elderiniń azamattary da bar, - deıdi atyraýlyq 11-synyp oqýshysy Eldar Qurmashev.