Búgin Astanada tuńǵysh ret kókpardan ótken Azııa chempıonaty máresine jetti. Osy kúni elimizdiń bas komandasy bes kún boıy «Qazanat» atshabarynyń shańyn qaqqan komandalar arasynda tuńǵysh Azııa chempıony atandy! Sóıtip, kópshiligimiz kútkendeı, Azııa chempıony degen mártebeli ataqty basqa emes, ózimizdiń ulttyq qurama komandamyz ıelenip, Astana aspanynda elimizdiń ánuranyn taǵy da qalyqtatty.
Osy kúni bizdiń qurama fınalda Qyrǵyzstan komandasymen kezdesip, 4:2 esebimen utty. Bul kezdesýde bizdiń qurama Azııa chempıony ataǵyn jeńip alý bar kúsh-jigerin jumsap, aılar boıy daıyndalǵan eńbeginiń terin tókti dese bolady. Onda komandanyń bas jattyqtyrýshysy Qýanyshbek Quramaev bastaǵan jigitterimiz ózderiniń eptiligimen, bula kúshiniń myqtylyǵymen jurtshylyq aldynda jankúıerlerin jerge qaratpaı, qarsylastarynan taza, ádil ótken oıynda basymdyq tanytty. Kezdesýdiń ádil, taza ótkenin qyrǵyz quramasynyń bas jattyqtyrýshysy da moıyndap, alańnyń bas tóreshisi men tórishilerge alǵysyn bildirdi. Jalpy, Azııa chempıonatynda saıdyń tasyndaı iriktelgen bizdiń jigitterdiń bári de jarady. Eger attaryn atap ótetin bolsaq, Baqtybaı Shyrynqulov, Baǵlan Shyrymbaev, Qulajan Toǵaıbaev, Dáýletbek Ombaev, Erkebaı Omarbek, Nurjigit Myrzabaev, Arslan Qabjanov, Ermek Kóbeı, Manarbek Dúısenbıev, Ulan Baıtóreev, Temirhan Aıtbaev pen Aleksandr Pýpenko degen at qulaǵynda oınaǵan jigitter tamasha óner kórsetti. Sonymen birge oıynda jigitterdiń mingen tulparlarynyń da elimizdiń Azııa chempıony ataǵyn jeńip alýyna úles qosqanyn aıtpaı ketýge bolmas. Ásirese, «Lazer» atty tulpardyń aqyldylyǵy men jyldamdyǵyna qaıran qalmasqa shara joq. Kezdesýde bizdiń quramanyń qazandyqqa salǵan serkeleriniń kóbisi osy Baqtybaı Shyrynqulovtyń tulpardyń kómegimen boldy. Osy tulpar chempıonat sońynda «Er qanaty» degen nomınasııasyn ıelenip, ózine laıyqty qurmetke bólendi.
Bıylǵy chempıonatqa basqa komandalardyń da jaqsy daıyndyqpen kelgenderin aıtqan bolatynbyz. Máselen, fınalda Qazaqstan quramasymen kezdesken Qyrǵyzstan komandasy barlyq jaǵynan Azııa chempıony atanýǵa laıyq ekenderin kórsetti. Qazir bul elde kókparǵa memleket tarapynan kóńil bólinip, úlken qoldaý kórsetiledi eken. Mine, osyndaı kómektiń nátıjesinde aıyrqalpaqty aǵaıyndarymyz jyl ótken saıyn bizdiń quramaǵa naǵyz qarsylas bolyp, keı jerde ózderin myqty sanaıtyndaı jaǵdaıǵa da tóbesi bir eli jetpeı qalady. Bıylǵy kókpar básekesine de qyrǵyz quramasy jaqsy daıyndyqpen kelipti. Kelgende, Azııa chempıonatyna bizdiń quramaǵa bildirtpeı, biz bilmeıtin jańa komandany jasaqtap, ákelipti. Sol jigitteriniń biri – Nurmuhamed Qoıshekeev chempıonatta «úzdik salymshy» degen ataqty ıelendi. Qyrǵyzdardyń tulparlarynyń ózi de bir tóbe desek artyq etpes.
Fınalda olardyń jyldam, shapshań attary biraz attarymyzdy ilestirmeı kete jazdady. Qyrǵyzdar komandasyna fınalǵa joldama alyp bergen osy tulparlary deýge bolady. Degenmen, bizdiń quramanyń jigitteri fınalda qyrǵyzdardan barlyq jaǵynan myqty ekenderin dáleldep berdi. Azııa chempıonatynda basqa elderden Tájikstan quramasynyń óneri de kópshiliktiń kóńilinen shyqty. Olar Qazaqstannan jeńilgenimen, Reseı men Mońǵolııa komandalaryn, al úshinshi oryn úshin ótken oıynda Qytaıdyń Ile qazaq aýdanynyń komandasyn utyp, qola júldege ıe boldy. Bul komandalardyń arasyndaǵy kezdesý de búgin ótti. Al keshe, senbi kúni Reseı О́zbekstan quramasyn 9:2 esebimen jeńip, besinshi oryndy ıelendi. Jetinshi oryn úshin kezdesýde Mońǵolııanyń Baıan О́lgeı qazaqtary Túrkııa quramasyn 9:4 esebimen utty. Sóıtip, Azııa chempıonatynda Túrkııa eń sońǵy oryndy qanaǵat tutty.
Búgin chempıonattyń jabylý saltanatynda Ulttyq sport túrleri qaýymdastyǵynyń prezıdenti, «Kókbóri» halyqaralyq federasııasynyń basshysy Qaırat Satybaldy kókpardan
Qazaqstan qurama komandasyna bas júldeni tapsyrdy. Osy kezde qaýymdastyq prezıdentiniń orynbasary Bekbolat Tileýhan kelesi Azııa chempıonatynyń 2015 jyly Túrkııanyń Ystambul qalasynda ótetinin habarlady.
Dastan Kenjalın.