Atyraý oblysynda respýblıkalyq deńgeıdegi joldarda júrgizilip jatqan qaıta jańǵyrtý, sondaı-aq, jóndeý jumystary júrgizilip jatyr. «Jol aktıvteriniń ulttyq sapa ortalyǵy» RMK Atyraý oblystyq fılıalynyń mamandary jyl basynan beri bul jumystyń sapasyn, qurylys materıaldaryn tekserip, 27 túrli kemshilikti anyqtady.
Oblystyq fılıal dırektorynyń mindetin atqarýshy Jantas Sháripovtyń aıtýynsha, jyl basynan beri «Aqtóbe-Atyraý-Astrahan» avtomobıl jolyn qaıta jańǵyrtý, «Atyraý-Oral» jáne «Dossor-Qulsary-Beıneý baǵytyndaǵy avtomobıl joldaryn kútip-ustaý, aǵymdaǵy jóndeý, sondaı-aq, kepildikte turǵan nysandarda 181 ret tekseris uıymdastyrylǵan.
–Nátıjesinde 27 aqaý anyqtaldy. Máselen, «Atyraý-Oral» jol kútip-ustaýda, ıaǵnı, jarylǵan bólikterine shaıyr quıý kezinde kemshilikter tabyldy. Sondaı-aq, «Atyraý-Oral» jáne «Aqtóbe-Atyraý-Astrahan» baǵytyndaǵy kepildikte turǵan joldy túngi ýaqytta jaryqtandyrý, «Dossor-Qulsary» jolyndaǵy ortasha jóndeý jumystarynda da kemshiliktiń bary belgili boldy. Atalǵan aqaýlardy ýaqytyly joıý úshin tapsyrys berýshi mekeme men merdigerlerge hat joldandy, - deıdi J.Sháripov.
Ortalyq mamandary bıylǵy birinshi toqsanda joldarda júrgizilgen tekseriste 101 ret synama alǵan. Zerthanada qoldanystaǵy qıyrshyqtas, qum, shaıyr, malta tas aralas qumdy qospa, sementti beton, bıtým, usaq qaldyqtardyń sapasyn tekserý barysynda sáıkessizdiktiń bir deregin anyqtalǵan.
Bul – «Dossor-Qulsary» jolyndaǵy ortasha jóndeý jumystaryna paıdalanylǵan materıal. Atyraý aımaǵyndaǵy joldarǵa qajetti materıaldar PGS, qıyrshyqtas, bıtým kórshiles Aqtóbe, Mańǵystaý oblystarynan ákelinedi. Mamandardyń aıtýynsha, óńirdegi respýblıkalyq joldardyń sapasy oblystyq deńgeıdegi joldarmen salystyrǵanda áldeqaıda joǵary bolyp otyr.