2020 jylǵy 29 sáýirde Qazaqstannan un túrinde jiberilgen gýmanıtarlyq kómektiń alǵashqy partııasy (800 tonna) Qyrǵyz Respýblıkasyna jetkizildi. Bul týraly Syrtqy ister mınıstrliginiń baspasóz qyzmeti habarlady.
Atalǵan júk barlyq sanıtarlyq-epıdemıologııalyq normalar saqtaı otyryp, temirjol arqyly 12 vagonmen ákelindi.
Qazaqstannyń Prezıdenti Qasym-Jomart Toqaev pandemııaǵa qarsy áreket jasaý kezeńinde kórshi elderge qoldaý kórsetý maqsatynda Qyrǵyzstan men Tájikstanǵa jalpy somasy 3 mln. AQSh dollarynan astam qarajatqa ár elge 5 myń tonna kóleminde un túrinde gýmanıtarlyq kómek berý týraly sheshim qabyldaǵanyn atap ótken jón.
Qyrǵyzstannyń Aýyl sharýashylyǵy, tamaq ónerkásibi jáne melıorasııa mınıstri Erkınbek Chodýevtyń aıtýynsha qyrǵyz tarapy Qazaqstan Respýblıkasynyń Úkimeti kórsetken kómekti joǵary baǵalaıdy jáne baýyrlas qazaq halqyna tereń rızashylyq bildiredi.
Gýmanıtarlyq kómek Qyrǵyz Respýblıkasy Úkimetiniń janyndaǵy Memlekettik materıaldyq rezervter qorynyń qoımasyna ornalastyryldy.