Elorda ákimdiginde qala ákimi Altaı Kólginovtiń basshylyǵymen qala men aýlalardy abattandyrý, sanıtarlyq tazalaý jáne joldardy jóndeý máseleleri talqylandy. Qala ákimi aýdan ákimdikterinde jaýapkershilikti bir-birine silteý faktileri bar ekenin aıtty. Bul týraly Nur-Sultan qalasy ákimdiginiń baspasóz qyzmeti habarlady.
«Sizder aýdanǵa tıesili aýmaqty jaıaý aralap, teksermeısizder, aýdandaryńyzda qandaı problemalar bar ekenin bilmeısizder», - dep atap ótti.
«Memlekettik komıssııa birqatar kásiporyndardyń jumysyn qaıta bastaýǵa ruqsat berdi. Abattandyrýmen aınalysý kerek. Qazir jalpyqalalyq senbilikterdiń maýsymy, biraq ókinishke oraı, biz olardy ótkize almaımyz. Qalany jaıaý aralaǵan kezde sizdiń jumystaryńyzǵa birqatar eskertýler bar ekeni anyq kórinip turady. Aýdanǵa tıesili terrıtorııany jaıaý aralaý kerek,sonda ǵana aýdandarda qandaı problemalar bar ekenin kóresizder. Qarly qystan keıin trotýarlardy, plıtalardy, qorshaýlardy retke keltirý kerek. Qazir jol jóndeý jumystaryna kirisip kettik. Jumystyń sapasyn baqylaý qajet. Shaǵymdardyń kóbi Almaty aýdanyna tıesili. Aýdan ákimine qysqa merzim ishinde barlyq kemshilikterdi túzetýdi tapsyramyn. Barlyq aýdan ákimderi abattandyrý, kógaldandyrý, ınfraqurylymdy jóndeý máselelerimen belsendi aınalysýy tıis. Turǵyndarǵa dalaǵa shyǵýǵa ruqsat berildi. Olar serýendegen kezde skverler men aýla alańdaryna barady, barlyǵy daıyn bolýy tıis. Sharýashylyqty muqııat kútip ustaý kerek!»,- dedi qala ákimi Altaı Kólginov.
«Jumyspen qamtýdyń jol kartasy» baǵdarlamasy aıasynda aýqymdy jumystar atqarylady. Bıyl elordada 50-ge jýyq qoǵamdyq oryn abattandyrylady. Onyń ishinde saıabaqtar, skverler jáne basqa da adam kóp jınalatyn oryndar bar. 150 aýla qamtylady. «Jumyspen qamtýdyń jol kartasy» baǵdarlamasy aıasynda elordada 15 myń jumys orny ashylady. Birinshi kezekte jumys izdeýshiler jumyspen qamtý ortalyqtary arqyly jumyspen qamtylady.