Qala ákimi Murat Áıtenov Shymkenttegi jańadan boı kóterip jatqan bilim oshaqtarynyń qurylysymen tanysty.
Murat Áıtenov aldymen Arǵynbekov kóshesiniń boıynan salyp jatqan 1200 oryndyq mekteptegi qurylys barysyn kórdi. Búginde «Atameken korporasııasy» qurylysyn júrgizip jatqan ǵımarattyń qabyrǵasy kóterilip, shatyry jabylǵan. 3 gektar jerge ornalasqan mekteptiń qurylysyna 1 mlrd 900 mln teńge qarastyrylǵan. Merdiger kompanııa nysandy qyrkúıek aıynda tapsyrýdy josparlap otyr.
Qala ákimi odan soń Asar-2 shaǵyn aýdanynda boı kóterip jatqan 1200 oryndyq mektepke bardy. Irgetasy qańtar aıynda qalana bastaǵan bilim oshaǵy jospar boıynsha jeltoqsanda bitýi tıis. Qurylysty júrgizip jatqan «MK tehnostroı servıs» kompanııasynyń ókilderi pandemııaǵa baılanysty eldegi tótenshe jaǵdaı kezinde ǵımarattyń syrtqy qasbetine qoıylatyn keramogranıtti Reseıden aldyrý qıyn bolyp jatqanyn alǵa tartty. Qıyn tusta kómektesýge ázir ekenin aıtqan Murat Dúısenbekuly mundaı qurylys zattaryn otandyq ónimderden alýǵa usynys berdi.
Sodan keıin qala basshysy Samal-3 shaǵyn aýdanyndaǵy №6 emhana mańynan boı kóterip jatqan mektep qurylysynyń barysymen tanysty. Qurylysyna bıýdjetten 2 mıllıardqa jýyq qarjy bólingen bilim oshaǵy sanaýly kúnde daıyn bolady eken. Jańa ǵımaratty aralap kórgen Murat Dúısenbekuly mektepti jaqyn kúnderi qabyldap, qyrkúıekte oqýshylardy qabyldaýǵa daıyndaýdy tapsyrdy.
Bıyl Shymkentte 9 mektepti paıdalanýǵa berý kózdelip otyr. Onyń úsheýi 1200 oryndyq jańa mektep bolsa, beseýi 300 oryndyq qosymsha qurylys. Taǵy bireýi 100 oryndyq saz mektebi bolmaq.
Shymkent