Qaraǵandy oblysynyń aýmaǵynda jumysy ekpindi júrgizilip jatqan qurylystyń biri – Qaraǵandy-Balqash kúre joly. Bul joldyń Balqash kóli jaǵasynda týrızmdi damytýǵa qosar úlesi zor bolady degendi aıtady mamandar. Qazirgi ýaqytta atalǵan ýchaskedegi jumystarǵa 1800 adam men 900-ge jýyq tehnıka kúshi jumyldyrylǵan.
Árıne, jol qurylysyna karantınniń de keri áseri boldy. Jumys sál kesheýildep, kesteden qalyńqyrap baryp bastaldy. Degenmen, jobany iske asyryp jatqan merdiger kompanııanyń ókili qurylys jumystary bıylǵy jyldyń sońyna taman bitedi dep ýáde berip otyr. Jol bıyl paıdalanýǵa berilgenmen, onyń abattandyrý jumystary keler jyldyń úlesine qalypty...
Sonymen qatar, bıyl Qaraǵandyny aınalyp ótetin Soltústik-Shyǵys tas jolynyń qurylys jumystary da qaıta jandana túsken. Uzyndyǵy 48 shaqyrymnan asatyn jańa tórt jolaqty joldyń qurylysy byltyr bastalǵan bolatyn. Qurylysshylar bıyldyń ózinde jol boıyndaǵy bes kópir ótkelin saldy. Endigi qalǵan jumys ońaıyraq: qazir merdiger kompanııa jol belgilerin salý, qorshaýlar jasaý jáne jaryq shamdaryn ornatýmen aınalysýda. Jol qurylysy áli tolyq bitpese de, qazirgi ýaqytta bul trassanyń boıynda kólikter júre bastaǵan.
Bul jobamen aınalysyp jatqan merdiger kompanııa – «Sıne Mıdas Stroı» JShS-niń ókili Alı Chetkın jumystyń 93%-ǵa bitkenin aıtady. Tek, jol boıyn abattandyrý ǵana qalǵan. Ol jumystar aldaǵy eki aıǵa jeter-jetpes ýaqyt ishinde tolyq aıaqtalyp, óńir ekonomıkasy úshin mańyzy zor jol maýsym aıynda paıdalanýǵa beriledi eken.
Bıyl «Nurly jol» memlekettik baǵdarlamasy aıasynda Qaraǵandy oblysynda jol-qurylys jumystarymen 800 shaqyrym jol qamtylady dep josparlanǵan.