Qyzylordada «Bolashaq» ýnıversıtetiniń uıymdastyrýymen pedagog-ǵalymdardyń III respýblıkalyq onlaın-sleti ótip jatyr. Qatysýshylar eki kún boıy tótenshe jaǵdaı kezinde bilim berýdi uıymdastyrý máseleleri tóńireginde ıdeıalarymen bólisýde.
Pikir almasý alańynyń alǵashqy kúninde Qyzylorda Zııatkerlik mektebiniń dırektory Baqyt Jumataı Nazarbaev Zııatkerlik mektepteri júıesindegi qashyqtan oqytýdy engizý tájirıbesi týraly aıtty. Tyńdaýshylar nazaryna oqýshylarǵa onlaın rejıminde oqýǵa qolaıly jaǵdaı jasaý úshin atqarylǵan jumystar tanystyryldy. Onyń ishinde birqatar elder boıynsha bilim berý júıesin zertteý nátıjeleri, oqý josparlaryn ázirleý, muǵalimderdiń biliktiligin arttyrý kýrstary, oqýshylar men ata-analarǵa keńes berý, yńǵaıly sabaq kestesin qurý, onlaın sabaqtar ótkizý, bilim berýdi baqylaý jáne oqýdaǵy olqylyqtardy boldyrmaý baǵytynda júrgizilgen jumystardy kórsetti. Sondaı-aq, Zııatkerlik mektepterdiń onlaın rejıminde sátti paıdalanylatyn Teams baǵdarlamasy men basqa da sıfrlyq resýrstardyń múmkindikterin tanystyrdy.
- Búginde elimizde aqparattyq tehnologııany damytý óte mańyzdy. Bul ár túrli áleýmettik deńgeıdegi balalardyń teń bilim alýyna múmkindik beredi jáne aýyl men qala mektepteri arasyndaǵy alshaqtyqty jaqyndata túsedi, – deıdi Baqyt Jumataı.
Slet barysynda qatysýshylar Zııatkerlik mektepterdiń qazirgi bilim berýdi túrlendirýdegi mańyzdylyǵyn atap ótti. NZM tájirıbesi búginde elimizdiń kóptegen orta jáne joǵary oqý oryndarynda qoldanylady.