Atyraý oblysyndaǵy Teńiz kenishinde jumys istegen jumysshylardyń qaýipti indetke shaldyǵý deregi kún saıyn kóbeıip barady.
Keshe Tótenshe jaǵdaı rejımin qamtamasyz etý jónindegi óńirlik jedel shtab kenish jumysshylary arasynan 15 adamnyń koronavırýs ınfeksııasyn juqtyrǵanyn habarlap edi. Endi búgin taǵy toǵyz adam atalǵan indettiń shyrmaýyna ilinipti.
Degenmen, oblys ákimdigi Teńiz kenishindegi ahýaldy baqylaýǵa alyp otyr. Oblys ákimi Mahambet Dosmuhambetovtiń málim etýinshe, qazir arnaıy komssııa quryldy. Oǵan oblys ákiminiń birinshi orynbasary Serik Shapkenov jetekshilik etedi.
– Munyń bári –ýaqytsha qıyndyq. Kúrdeli jaǵdaıǵa qaramastan, jumysty jalǵastyrýymyz kerek. Teńiz kenishindegi ahýal boıynsha ótken aptanyń basynda arnaıy komıssııa qurdyq. Oǵan tóraǵalyq etetin orynbasarym Serik Shapkenov Teńiz kenishine baryp, áli kúnge deıin sonda jumys istep jatyr. Komıssııanyń basty maqsaty— kenishtegi jumysshylardyń qaýipsizdigin qamtamasyz etip, óńirlerine jiberýdi úılestirý, -dedi ken ornyndaǵy ahýalǵa baılanysty selektorlyq keńes ótkizgen Mahambet Dosmuhambetov.
Ken ornynan 12 myńǵa jýyq jumysshy shyǵarylyp, turǵylyqty mekenjaıyna jetkizilgen. Jumysshylar kenishten shyǵarylar aldynda qaýipti indetti anyqtaıtyn testten ótkizilip, óz óńirlerine ınfeksııadan taza bolsa ǵana jiberiledi.
– Shyǵarylǵandardyń 3000-ǵa jýyǵy –Atyraý oblysynyń turǵyndary, -dedi selektorlyq keńeske Teńiz ken ornynan tikeleı baılanysqa shyqqan oblys ákiminiń birinshi orynbasary Serik Shapkenov.
Onyń aıtýynsha, vahtalyq qalashyqtardyń barlyǵynda turaqty dezınfeksııalaý júrgizilýde. Tótenshe jaǵdaı kezindegi kúsheıtilgen karantın talaptaryna sáıkes, ár vahtalyq qalashyqtyń arasynda ózara qatynaýǵa shekteý qoıyldy. Al, Teńiz kenishine qatynaıtyn joldarǵa tórt blok post ornatylyp, aınalma dala joldary baqylaýǵa alynypty. Karantındik aımaqta polısııa, qaýipsizdik qyzmetinen qurylǵan patrýl jumys isteýde.
– Bul jaǵdaıdy muqııat baqylaýda ustaýymyz kerek. О́zimniń orynbasarlaryma, «Teńizshevroıl» kompanııasynyń basshylyǵyna qyzmetkerlerdi shyǵarýdy tııanaqty aıaqtaýdy tapsyramyn. Jumys oryndarynyń qysqarmaýy men jumysshylardyń eńbekaqysynyń saqtalýy basty nazarda bolýy tıis,- dep tapsyrma berdi oblys ákimi Mahambet Dosmuhambetov.