AQSh-tyń Nıý-Iork qalasyndaǵy álemge áıgili Times Square alańynda Naýryz merekesine arnalǵan mádenı is-shara ótti. Kóktemniń jańarýyn, bereke men birlikti bildiretin ulttyq meıramdy ulyqtaýǵa jınalǵan jurtshylyq qazaqtyń dástúri men ónerine kýá boldy, dep habarlaıdy Egemen.kz.
Merekelik baǵdarlama aıasynda «Álqıssa» dombyra stýdııasynyń ónerpazdary sahnaǵa shyǵyp, ulttyq mýzykalyq murany tanystyrdy. Qos ishektiń úni megapolıstiń qaq ortasynda shyrqalyp, jınalǵan kórermenderdiń erekshe yqylasyna bólendi. Dombyramen oryndalǵan kúıler men ánder qazaq mádenıetiniń baılyǵy men tereńdigin aıqyn kórsetti.
Is-shara barysynda ónerpazdar halyq arasynda keńinen tanymal «Sarjaılaý» ánin oryndady. Áýezdi án alańǵa jınalǵan kópshiliktiń kóńil kúıin kóterip, Naýryzdyń shattyqqa toly rýhyn sezinýge múmkindik berdi. Kórermender ónerpazdardy uzaq qol soǵyp, jyly qabyldady.
Uıymdastyrýshylardyń aıtýynsha, mundaı mádenı sharalardyń basty maqsaty – qazaqtyń salt-dástúri men ulttyq ónerin shetelde nasıhattaý, sondaı-aq túrli etnos ókilderi arasyndaǵy mádenı baılanystardy nyǵaıtý. Times Square sııaqty álem nazaryn aýdaratyn alańda Naýryzdy atap ótý Qazaqstan mádenıetiniń halyqaralyq deńgeıde tanylýyna yqpal etedi.
Sońǵy jyldary Naýryz meıramy sheteldegi qazaq dıasporasy arasynda da keńinen toılanyp keledi. Ásirese AQSh-tyń iri qalalarynda uıymdastyrylatyn konsertter, kórmeler men ulttyq taǵamdar festıvalderi bul merekege degen qyzyǵýshylyqtyń artyp otyrǵanyn kórsetedi.
Nıý-Iork tórinde ótken bul shara da kóktemniń kelýin ǵana emes, halyqtar arasyndaǵy dostyq pen mádenı almasýdyń mańyzyn aıqyndaı tústi. Qazaqtyń kúıi men áni álemniń eń qarbalas alańdarynyń birinde shyrqalyp, ulttyq ónerdiń shekara tanymaıtynyn taǵy bir márte dáleldedi.