Týrızm jáne sport mınıstrligi Dúnıejúzilik dopıngke qarsy agenttikpen (WADA) ózara túsinistik týraly memorandýmǵa qol qoıdy, dep jazady Egemen.kz.
Qol qoıý rásimi Polshanyń Torýn qalasynda ótken jabyq ǵımarattaǵy jeńil atletıkadan álem chempıonaty aıasynda ótti. Qujatqa mınıstr Erbol Myrzabosynov pen WADA prezıdenti Vıtold Banka arasyndaǵy kezdesý barysynda qol qoıyldy.
Memorandým elimizdiń taza sport qaǵıdattaryna berik ekenin rastaıdy, sondaı-aq Memleket basshysynyń halyqaralyq yntymaqtastyqty damytý jáne dopıngke qarsy saıasatty jetildirý jónindegi tapsyrmalaryn iske asyrýǵa baǵyttalǵan mańyzdy qadamdardyń biri sanalady.
«Bizdiń belsendi yntymaqtastyǵymyz ótken jyly Astanada Memleket basshysynyń jyly qabyldaýynan bastaý aldy dep esepteımin. Dopıngke qarsy zertteýlerdiń damýyna kórsetken qoldaýy úshin Prezıdent Qasym-Jomart Toqaevtyń tulǵasynda Qazaqstanǵa alǵysymdy bildiremin. Bul kelisim Qazaqstannyń óńirde taza sportty damytýdaǵy jetekshi róliniń nyǵaıyp kele jatqanyn kórsetedi», dedi Vıtold Banka.
Sonymen qatar taraptar 2027 jyly Astanada WADA-nyń Atqarýshy komıteti men Quryltaı keńesiniń otyrystaryn ótkizý múmkindigin talqylady.
Erbol Myrzabosynov Qazaqstannyń adal básekelestik qaǵıdattaryn udaıy ustanatynyn jáne dopıngke qarsy bilim berý júıesin belsendi túrde damytyp jatqanyn atap ótti.
«WADA-men yntymaqtastyq biz úshin strategııalyq mańyzǵa ıe. Qazaqstanda taza sport mádenıetin qalyptastyrýǵa, halyqaralyq standarttardy nyǵaıtýǵa jáne álemdik ozyq tájirıbelerdi engizýge basymdyq beriledi. Elimiz dopıngtiń aldyn alý jáne bilim berý baǵytyndaǵy baǵdarlamalardy qoldap, olardy júıeli túrde júzege asyryp keledi», dedi mınıstr.
Kezdesý aıasynda salalyq bilim berý jáne ǵylymı ınfraqurylymdy damytý máselesi de erekshe nazarǵa alyndy. Qazaq ulttyq sport ýnıversıteti mamandar daıarlaý men tájirıbe almasýdyń tıimdi alańy retinde qarastyrylyp, Qazaqstannyń Ortalyq Azııadaǵy dopıngke qarsy saıasattaǵy kóshbasshylyǵyn nyǵaıtatyn bilim berý haby retindegi rólin kúsheıtýge yqpal etedi.
Eske sala keteıik, ótken jyly Memleket basshysy WADA prezıdenti Vıtold Bankany qabyldaǵan bolatyn. Ol agenttik prezıdentteri ishinde Qazaqstanǵa alǵash kelgenderdiń biri edi. Kezdesý barysynda Memleket basshysy Vıtold Bankany II dárejeli «Dostyq» ordenimen marapattady. Bıylǵy memorandým ekijaqty yntymaqtastyqtyń júıeli túrde damyp kele jatqanyn kórsetedi.