Naryqta nannyń quny – 100 teńge. Kóp aqsha emes árıne, biraq kúndigine eseptesek, árbir otbasyǵa kem degende 2 ne 3 bólke ketedi. As atasynsyz dastarqannyń kórki kirmesi anyq. Ámse, toıymdy tamaq. Osy bir tátti ónimniń búginde dúkenderde asa bir suranysqa ıe bolǵanyna tańǵalasyń. Ony qyz-kelinshekterdiń erinshektigine jorısyń ba? Joq álde ýaqytty yqshamdap, jeńil jolmen satyp alǵan tıimdi me? Kim bilsin, áıteýir artyq ashytqy arqyly kóterilgen nanǵa bári zárý.
Azyq-túlik baǵasynyń sharyqtap bara jatqanyna alańdaýly halyq nan qunynyń óskenine de bir daýryǵyp basylǵan bolatyn. Alqap-alqap bıdaıǵa tolǵan shalqar dalamyz bar, osy bizge ne jetpeıdi dep kúrsinesiń... Nur-Sultan qalalyq ınvestısııalar jáne kásipkerlikti damytý departamentiniń basshysy Erlan Bekmurzaev: «Qazirdiń ózinde birneshe saýda ortalyǵy áleýmettik mańyzy bar azyq-túlik ónimderin óz baǵasymen satýda. Bul – «Keńmart» jáne «Magným». Un da jetkilikti mólsherde satyp alyndy. Osyǵan baılanysty qaladaǵy birinshi surypty unnan pisirilgen nan baǵasy 90-95 teńgeden aspaıtyn bolady» dep, áleýmettik jelide aıqaı týdyrǵan máselege núkte qoıdy. Bul málimdemeden keıin úıdegi qyz-kelinshekterdiń kóńili ornyna túsip, karantın ýaqytynda eter ermeginiń azaıǵanyna máz bolysqan. «Dúkenge barar syltaýdyń tabylǵany munsha jaqsy bolar ma?!».
Qala mádenıetiniń aýylǵa qaraǵanda qalyp-keskini múlde ózgeshe. Ýaqyt esepteýli, ár adym sanaýly. Alyp-ushqan kólikter, asyqqan adamdardyń shoǵyry. Qaıda bara jatyr? Qaıdan kele jatyr? Belgisiz. Shuǵyl da shapshań. Olarǵa ómir sonysymen qyzyq ta sııaqty. Etek basty tirlik erkine jibermeıdi. Úıdegi jumysqa qabiletti adamdardyń báriniń qoly bos emes. Jumysbastylyq qoly qalt bosaǵan pendeniń kelesi kúngi josparyna da kese-kóldeneń turady. Osy tusta áıel zatyn aqtap alýǵa bolady-aq. Oǵan sebep te az emes. Áıtse de, áttegen-aı deıtin tusymyz osy bolyp otyr emes pe?!
Karantın kezindegi bas qaladaǵy shaǵyn sıýjet kóz aldymyzǵa úlken ózgeristiń shet jaǵasyn shyǵarǵandaı boldy. Gáp, atar tań men batar kúnniń qysqalyǵynda dep zamannyń qubylǵanyn qýalap, kináni ózgege ıtere salýǵa bolady, árıne. Áńgimeniń tórkini – naýbaıhana izdegen áıel zatynyń ántek qylyǵy. Dúkennen dúkenge aýysyp, kezekten kezek kútip bir bólke nan úshin kóshe kezgen kelinshekterdiń áreketi kóńilge kóleńke uıalatady. Bir taba nan úshin...
Qaladaǵy qarashanyń jumysy qaýyrttyǵyn megzep, sylap-sıpap ótip ketýge bolady delik, al aýyldaǵy aǵaıyndy qalaı aqtap alamyz!? Osy týrasynda bir oqıǵanyń eske túsip turǵany.
Taksıde úsh áıel otyr. Úsheýi de kesken shórkedeı keltek, úıgen tomardaı bir-bir dúnıe. Qalaǵa emes. Aýylǵa ketip baramyz. Aıtystaryna qaraǵanda, baǵa ósipti. Alty qyrdyń astynda qyspen birge boz qyraý bolyp qalyń qıynshylyqtyń sup-sýyq sulbasy jatty. Qalys otyrǵan bireýi sanap kórdi. Bári de bul otyrǵan úsheýiniń qaltasyna ońaı salmaq salmaıtyn kórinedi. Kúıeýleriniń tapqany nesıe tóleýge ketip jatqanyn aıtýdy da umytpaıdy. «Eń qıyny – nan qymbattaıdy eken» deıdi.
О́z qulaǵyma ózim senbeımin. Un emes, nan qymbattapty. Álgi tátelerim qalada turyp bulaı aıtsa, «jón ǵoı, jón» dep quptar ma edik, quptamas pa edik, kim bilipti?! Biraq, aýylda aýqaty baılanǵan sharýa áıeli úshin nannyń qymbattaǵany qıynshylyq bolmaý kerek edi ǵoı. Qol-aıaǵy kelsaptaı, sap-saý adam úshin úıinde nannyń ıisi burqyrasa, kóshedegi bólkeniń úıge baǵa súırep kelmesi anyq emes pe? Al un qymbattasa, onyń jaıy bir bólek. Kóppen kórgen uly toıdyń kebin kıip, bul ótpeli kezeńnen de kózdi jumyp óte shyǵar bolar.
Nannyń ıisi – balalyǵymnyń ıisi sekildi. Tezek terip, taba nan japqan ájemniń sulbasy keledi kóz aldyma. Qazan-oshaqty qaraýyldap júrgen qaradomalaqtar ystyq kúlsheni sol qalpynda asqazanǵa toǵytatyn. Qunarly tamaq. Keshke deıin qoı qýǵan balanyń kúndik asy. Qazirgi zaýyttyń nany sekildi emes, úgitilmeıdi. Ottyń jalynyna pisken qara nan qadirli de toıymdy. Saǵynasyń...