Birikken kúres álemi (UWW) 2020 jylǵy Tokıo Olımpıadasyna irikteý týrnıri Marokko, Majarstan jáne Qytaıda ótkiziletinin málimdedi. Qazaqstannyń Ulttyq Olımpıada komıtetiniń habarlaýynsha, bul sheshimdi Halyqaralyq Olımpıada komıteti de (HOK) rastaǵan.
Búginge deıin Olımpıada joldamasynyń teń jartysy sportshylarǵa úlestirilgen. Al Azııa aımaqtyq irikteý týrnıri Qytaıdyń Sııan qalasynda ótkiziletin boldy. Buǵan deıin koronavırýs qaýpiniń joǵarylaýyna baılanysty Sııandaǵy týrnır Qyrǵyzstan astanasy Bishkekke aýystyrylǵan edi.
Alaıda indetten qaýiptengen Qyrǵyzstan bıligi jarysty ótkizýden bas tartqan. Osylaısha, atalǵan týrnır kelesi jyly qaıtadan Sııan qalasynda uıymdastyrylady. Afrıka jáne Muhıt aımaǵynyń irikteý dodasy Marokkoda, eýropalyq irikteý syny Majarstanda ótedi.