Brıtandyq Matchroom Boxing promoýterlik kompanııasy talantty qazaqstandyq boksshy Danııar Eleýsinov týraly beınesıýjet jarııalady. Fılmde Eleýsinovtiń kásibı mansabyn bastaǵan kezi, odan keıingi damýy jáne rıng syrtyndaǵy sátteri kórsetilgen.
Qazaqstannyń maqtanyshyna aınalǵan Danııar Eleýsinov 2016 jyly Rıo Olımpıadasynda top jarǵannan keıin baǵyn kásipqoı boksta synap kórýge bel býdy. 2018 jyly alǵashqy jekpe-jegin ótkizgen otandasymyz búginge deıin 9 ret sharshy alańǵa kóterilip, barlyq qarsylasynan basym túsken. Onyń beseýin nokaýtpen jeńgenin de aıta keteıik.
Qandasymyz keıingi kezdesýin 2019 jyldyń 20 jeltoqsanynda meksıkalyq Alan Sancheske qarsy ótkizip, 5-raýndta sulatyp salǵan-dy. Sondaı-aq Eleýsinov 17 sáýirde AQSh-tyń Merılend shtatyndaǵy Okson-Hıll qalasynda álem eks-chempıony namıbııalyq boksshy Djýlıýs Indongoǵa (23-2, 12 KO) qarsy bokstasýy kerek edi. Biraq koronavırýs pandemııasyna baılanysty boks keshi keıinge shegerildi.