Qaraǵandy oblysyndaǵy Jezqazǵan qalasynda COVID-19 indetiniń jańa oshaǵy paıda boldy. Oblys ákiminiń baspasóz qyzmeti búgin bul qaladaǵy úsh turǵynnyń koronavırýs ınfeksııasyn juqtyrǵany týraly habarlama taratty.
Naýqastar 1996 jáne 2000 jyldary týǵan jas jigitter jáne 20 jastaǵy qyz bala. Olardyń barlyǵy da Reseıden kelgen bette karantınge ornalastyrylǵan eken. PTR-taldaý pasıentterde COVID-19 indetiniń belgileri bar ekenin rastaǵannan keıin, olar ınfeksııalyq stasıonarǵa jatqyzyldy.
Búgin belgili bolǵan tórtinshi naýqas Temirtaý qalasynan shyqty. Jasy 38-degi er adam buryn indet juqtyrǵandarmen baılanysta bolǵandyqtan karantınge ornalastyrylypty. Qazir ol da ınfeksııalyq stasıonarǵa jatqyzyldy.
Búgingi kúngi málimetke saı, Qaraǵandy oblysynda koronavırýs ınfeksııasyn juqtyrǵandardyń sany 159 pasıentke jetti. Onyń ishinde eki naýqas qaıtys boldy jáne 73 adam «jaman tumaýdan» jazyldy.