Almaty oblysynda karantın sharalary kezeń-kezeńimen jumsartý júze asa bastady. Bul týraly aımaqtyń bas memlekettik sanıtarııalyq dárigeri Qaırat Baımuhambetov keshegi kúni arnaıy qaýly qabyldaǵan bolatyn.
Qaýlyǵa sáıkes karantın sharalaryn jumsartý kezeńinde Almaty oblysynyń aýmaǵynda COVID-19 ınfeksııasy tirkelgenine baılanysty karantınniń kúsheıtilgen rejımi engizilgen eldi mekender men nysandardan basqa jerlerde optıka dúkenderi, turmystyq tehnıka satatyn dúkender, fotosalondar, gúl satatyn kıoskiler, jyljymaıtyn múlikterge qatysty operasııalar atqaratyn kompanııalar, jarnama agenttikteri, saqtandyrý kompanııalary, lombardtar, sol sııaqty aqparattyq-kommýnıkasııalyq tehnologııalar kompanııalary óz jumysyn bastaıdy. Tańerteńgi saǵat 9-dan keshki 17.00-ge deıin turmystyq jáne elektrondy tehnıkalardy jóndeý qyzmetin kórsetetin nysandar, sol sııaqty aýmaǵy 500 m² deıingi barlyq azyq-túlik dúkenderi jumys isteıdi. Shashtarazdar, sulýlyq salondary aldyn ala jazylym boıynsha qaıta iske kirisedi, jumys kestesi - saǵat 9-dan 18.00-ge deıin. Sanatorıılerde, balalardy saýyqtyrý mekemelerinde, memlekettik ulttyq tabıǵı saıabaqtarda, mýzeılerde jazǵy týrıstik maýsymǵa daıyndyq jumystary bastalady, týrıstik fırmalar jumys isteıdi, biraq ázirge týrısterdi qabyldaýǵa jáne qyzmet kórsetýge quqyǵy joq.
Sol sııaqty ashyq alańda kórermensiz sporttyq sharalar men jattyǵýlar ótkizýge ruqsat berildi. Bul rette oblystyń aýdan, qala ákimderine, oblystyq kásipkerlik jáne ındýstrıaldy-ınnovasııalyq damý basqarmasyna jáne oblystyq «Atameken» KUP-ǵa aqparattyq arnalar arqyly qyzmettiń shekteýlerin alyp tastaýǵa bekitilgen obektilerdi habardar etý, beıindi qaýymdastyqtardyń qatysýymen beınekonferensııa ótkizý, resmı veb-resýrstarǵa qajetti aqparatty ornalastyrýdy qamtamasyz etý tapsyryldy.
Jalpy, Almaty oblysy aýmaǵynda karantın áli alynyp tastalǵan joq. Sondyqtan barlyq sanıtarlyq-dezınfeksııalyq sharalar talaptaryn qatań saqtaý qajet. Osy talaptardyń buzylýy nemese oryndalmaýy anyqtalǵan jaǵdaıda tótenshe jaǵdaı kezindegi elimizdiń zańnamalaryna sáıkes jedel sharalar qabyldanatyn bolady.
Almaty oblysy