2020-2021 jyldarǵa arnalǵan jumyspen qamtýdyń jol kartasy sheńberinde 1265 jobany iske asyrý bastaldy, onda 17 myń jumys orny qurylyp, 10,3 myń adam jumysqa ornalastyryldy. Bul týraly Úkimet otyrysynda Eńbek jáne halyqty áleýmettik qorǵaý mınıstri Birjan Nurymbetov aıtty.
Mınıstr jumyspen qamtýdyń jol kartasy aıasynda qyzmetkerlerdiń keminde jartysy halyqty jumyspen qamtý ortalyqtary arqyly jumysqa qabyldanatynyn, basymdyq jumyssyz jastarǵa beriletinin atap ótti.
Jumyspen qamtýdyń jol kartasy ınfraqurylymdyq jobalaryn iske asyrý kezinde otandyq óndirýshilerdiń keminde 90% taýarlary men qyzmetterin qoldanýdy qamtamasyz etý erekshe eskeriledi. Sondaı-aq merdigerler sanıtarııalyq-epıdemıologııalyq sharalardy qoldana otyryp, qaýipsiz eńbek jaǵdaılaryn qamtamasyz etýge tıis.
Jergilikti atqarýshy organdar iske asyrý úshin 6 506 jobany usyndy, onyń 2 410-y respýblıkalyq bıýdjet qarajaty esebinen iske asyrylatyn bolady.
«1 mamyrdaǵy jaǵdaı boıynsha respýblıkalyq bıýdjet qarajaty esebinen iske asyrylatyn jobalar boıynsha 1 779 joba (nemese 73,8%) boıynsha memlekettik satyp alý konkýrstary aıaqtaldy. Birqatar óńirlerde 1 265 joba boıynsha jumystar bastalyp ketti, 17 myńnan astam jumys orny qurylyp, 10 332 jumysshy jumysqa qabyldandy», dedi Birjan Nurymbetov.
Jumyspen qamtýdyń jol kartasy aıasynda barlyǵy 255 myń jumys ornyn ashý josparlanýda. Bul rette JQJK jobalary bolashaqta 100 myńnan astam turaqty jumys ornyn ashýǵa negiz bolady.
Jumyspen qamtýdyń jol kartasy ınfraqurylymdyq jobalaryn iske asyrý 4 negizgi baǵyt boıynsha ótedi:
– áleýmettik-mádenı obektilerdi kúrdeli jáne aǵymdaǵy jóndeý, rekonstrýksııalaý jáne salý (2 703 joba);
– turǵyn úı-kommýnaldyq sharýashylyq obektilerin kúrdeli, ortasha jáne aǵymdaǵy jóndeý, rekonstrýksııalaý (1 039 joba);
– ınjenerlik-kólik ınfraqurylymyn kúrdeli, ortasha jáne aǵymdaǵy jóndeý, rekonstrýksııalaý jáne salý (1 799 joba);
– eldi mekenderdi abattandyrý (965 joba).
Mınıstr Jumyspen qamtýdyń jol kartasyn iske asyrý aıtarlyqtaı oń nátıje beretindigin atap ótti.
Mysaly, 80 jańa bilim berý obektisiniń qurylysy apatty jáne úsh aýysymdy mektepterdiń problemalaryn sheshýge, aýyldyq jerlerde bilim berý uıymdarynyń qoljetimdiligin arttyrýǵa, sondaı-aq 7 myńǵa jýyq pedagogty turaqty jumysqa ornalastyrýǵa múmkindik beredi. 24 Densaýlyq saqtaý obektisiniń qurylysy alǵashqy medısınalyq-sanıtarııalyq kómekke qoljetimdilikti arttyrady, sondaı-aq shamamen 1 myń medısına qyzmetkerin jumysqa ornalastyrýǵa múmkindik beredi. 36 mádenıet jáne sport nysanynyń qurylysy buqaralyq sportty damytýǵa oń áser etedi, jastar úshin bos ýaqyt máselesin sheshýge jáne 1,6 myń adamdy turaqty jumyspen qamtamasyz etýge múmkindik beredi.
О́z kezeginde, sý sharýashylyǵynyń 12 jańa obektisin salý jáne qoldanystaǵylaryn jańǵyrtý halyq úshin aýyz sýdyń qoljetimdiligin arttyrady, sýarmaly jerlerdiń kólemin keńeıtýge, paıdalanylmaıtyn jerlerdi aınalymǵa tartýǵa, aralas salalarda 77 myń adamdy jumyspen qamtýdy qamtamasyz etýge múmkindik beredi. Turǵyn úı-kommýnaldyq sharýashylyqtyń 247 jańa obektisin salý jáne qoldanystaǵylaryn jańǵyrtý turǵyn úı qurylysy úshin jaǵdaı jasaıdy, aýyl turǵyndary úshin kommýnaldyq qyzmetterdiń qoljetimdiligin qamtamasyz etedi, kommýnaldyq jelilerdiń tozýyn tómendetedi. Eldi mekenderdi abattandyrý olardyń syrtqy kelbetin jaqsartyp qana qoımaı, azamattardyń qaýipsiz jáne jaıly demalysy úshin jaǵdaı jasaıdy.