Sońǵy jyldary Atyraýda da egistik alqapty ulǵaıtýǵa bet buryldy. Byltyr 8 933 gektarǵa kókónis, baqsha jáne mal azyqtyq daqyldar egilgen edi.
Al, bıyl egistik alqabyn 9 222 gektarǵa ulǵaıtý josparlanyp otyr. Oblystyq aýyl sharýashylyǵy basqarmasynyń basshysy Qaırat Nurlybaevtyń aıtýynsha, kóktemgi jer jyrtý jumysy aıaqtaldy. Endi egin egý aldyndaǵy agrotehnıkalyq sharalar atqarylyp jatyr.
–Qazir 8 300 gektardyń jeri jyrtylyp, 1286 ga alqapqa tuqym sebildi. Bul jumys óńirdiń klımattyq ereksheligine oraı 20 maýsymǵa deıin jalǵasady, -deıdi ol.
Alaıda, oblys ákimi Mahambet Dosmuhambetov basa nazar aýdaratyn jaıttardy atady. Ákimniń málimetinshe, Inder aýdanynda kartop dánin egý baıaý júrgizilýde. Munda sýarý-sýlandyrý júıesi iske qosylmaǵan. Al, Qurmanǵazy aýdanynda mal azyqtyq daqyldar tuqymyn egý barysy tómen. Sondaı-aq Alǵabas-Joryq kanalynda jóndeý jumysy aıaqtalmaı otyr.