Almatydaǵy Qazaq ulttyq qyzdar pedagogıkalyq ýnıversıtetinde «Is júzinde birgemiz!» atty onlaın-suhbattar serııasy sátimen aıaqtaldy.
Oqý ornynyń baspasóz qyzmeti taratqan aqparatqa súıener bolsaq, 4-5 mamyr aralyǵynda uıymdastyrylatyn sharada joǵary oqý ornynyń qyzmetkerleri, úkimettik emes uıym ókilderi men stýdentter túrli taqyryp aıasynda sheberlik synyptaryn ótkizip, árqıly taqyryptar boıynsha áńgime órbitti.
Alǵashqy kúni Qyzdar ýnıversıtetiniń «Jan shýaǵy» psıhologııalyq ortalyǵynyń dırektory Kúlmash Elshibaeva men psıholog Sálıma Begasylova «Úı jaǵdaıyndaǵy balalar oıyndary (balalardyń psıhologııalyq ahýaly»), «Qashyqtan oqytý kezindegi mektep muǵalimderin psıhologııalyq qoldaý» taqyryptaryndaonlaın-suhbat ótkizdi.
Almaty qalasyndaǵy mektep oqýshylary men olardyń ata-analary qatysqan sharada mamandar qum terapııasy arqyly balalardyń psıhologııalyq ahýalyn tepe-teńdikte ustaýdyń túrli tásilderin untaq jarmasymen tájirıbe júzinde kórsetti. Qumdaǵy ǵajaıyp oıyndar men qummen sýret salý árbir oqýshynyń erekshe qyzyǵýshylyǵyn týdyrdy.
– Onlaın suhbat barysynda psıhologtar adamnyń kózi men qasyn, gúl túrlerin, jańbyrdan quımaq jasaý, oıý-órnek túrleri syndy jetkinshekterdiń oı-qııalyn shyńdap, kóńilderin jaılandyryp, jan tynyshtyǵyn seziný jattyǵýlaryn jasaı otyryp, olardy oqýshylarmen birge jasap úılesimdi keri baılanys ornatty. Bul áreketter óz kezeginde búldirshinderdiń qııalyn keńeıtip qana qoımaı, olardyń sana-sezimin damytýǵa septesedi, – deıdi oqý ornynyń Áleýmettik damý jónindegi prorektory Jańagúl Sultanova.
Mamandardyń aıtýynsha, atalǵan terapııa túriniń qum oıyndaryn 3 jastan bastap, eresek adamdar da jasaýǵa bolady. Iаǵnı, jas ereksheliktergeqandaı da bir shekteý joq.
– Qum terapııasy sabyrlylyq, zeıindilik, qyraǵylyq syndy qasıetterdi qalyptastyrady. Atalǵan terapııa kópshiliktiń kúndelikti betpe-bet kelip júrgen kóptegen keleńsizdikterine oń áserin tıgizedi dep úmittenemiz, – dep atap ótti Kúlmash Elshibaeva.
Sonymen qatar shara sheńberinde Volonterler lıgasynyń respýblıkalyq fılıalynyń tóraǵasy, «Nur Otan»partııasy Almaty qalalyq fılıaly saıası keńesiniń múshesi Aısulý Ernııazova «Karantındik sharalar eriktiler jumysyna qalaı áser etti?» taqyrybynda sóz qozǵap, keleli oıymen bólisti.
ALMATY