Elimizde jarııalanǵan tótenshe jaǵdaı rejimin qatań saqtaýǵa kóshken mektep oqýshylary qazirgi kezde qashyqtan bilim alýda. Karantın kezindegi bilim ustazdarmen qatar, oqýshylar men ata-analarǵa da zor jaýapkershilikter júktep otyr. Osy oraıda árbir ata ana balalardyń bilim alý sapasy, UBT-ny tapsyrý kórsetkishteri alańdatady.
Degenmen, «jumyla kótergen júk jeńil» degendeı mektep ustazdarynyń kúndelikti qoldaýynyń arqasynda oqýshylardyń daıyndyǵy kúsheıe túsken. Qazirgi kezde Almaty qalasynyń №178 lıseıinde qashyqtyqtan oqytý baǵdarlamasy tereń ári aýqymdy qamtylyp, mektep bitirýshilerge UBT-ǵa daıyndyq testteri apta saıyn júrgizilýde. Balalalarǵa mektep psıhologtary men pán muǵalimderiniń kómegi, qoldaý kórsetýi olardyń osyndaı qıyn sátte ózderine degen senimin arttyrýda. Q.H. Shadıev myrza basqaryp otyrǵan lıseıde bıyl qala boıynsha bitirýshiler sany erekshe kóp.
Onyń ishinde «Altyn belgige» úmitkerler 60-qa jýyq. Osy túlekterdi UBT-ǵa tirkeý burynǵydaı emes, jańa formatta júrgizildi. Bul ońaı jumys emes. Oqý isiniń meńgerýshisi K.S. Shajabaeva men 11-synyp jetekshileriniń eren eńbeginiń arqasynda barlyq oqýshylar UBT-ǵa júıeli túrde tirkeldi.
Sanaýly kúnderden soń mektep tabaldyryǵyn attap, ómirdiń jańa baspaldaǵyn attaǵaly otyrǵan oqýshylardyń ata-analarynyń atynan ulaǵatty ustazdar uıymyna sheksiz alǵysymyzdy bildirgimiz keledi. Erteńgi kúni balalar qalaǵan oqý oryndaryna túsip jatsa, ustazdar eńbeginiń janǵany. Ustaz úshin odan artyq baqyt bar ma?! Osyndaı pikirlerimen bólisken 11-synyp oqýshylarynyń ata-analary UBT-ny balalardyń joǵary kórsetkishtermen tapsyratynyna úlken senim artady.