Túrkistan oblysyndaǵy Maqtaaral aýdanyna qarasty birneshe aýyldyń Sardoba bógetiniń sýynynan zardap shegip, turǵyndarynyń qıynshylyqqa tap bolǵany Qaraǵandy oblysynyń da qabyrǵasyna qatty batty.
Búgin ońtústiktegi aǵaıynǵa qol ushyn berý maqsatynda Arqa tósinen ınjenerlik jáne sý sorǵysh tehnıkalarmen, sondaı-aq júzý quraldarymen jabdyqtalǵan qutqarýshylar toby attanyp ketti. Olar Maqtaaral aýdanynyń eldi mekenderindegi sý basý saldaryn joıý boıynsha apattyq-qutqarý jáne basqa da kezek kúttirmeıtin jumystardy júrgizýge kómek kórsetetin bolady.
Qutqarýshylar toby saparǵa attanbas buryn, Qaraǵandy oblystyq tótenshe jaǵdaılar jónindegi departamenttiń basshysy Ibragım Kúlshimbaev jeke quramnyń daıyndyq barysyn tekserip, nusqamalyq áńgime ótkizdi. Negizgi nazar jeke quramnyń, tehnıka men jabdyqtardyń ázirligin qamtamasyz etýge, sondaı-aq tehnıka qaýipsizdigi máselelerine aýdaryldy.
Atalǵan departament basshysy jeke quram qutqarýshylaryna júktelgen mindetterdi oryndaý barysynda barynsha tózimdilik tanytý talap etiletindigin eskertti.
Eske salsaq, mamyr aıynyń 1-shi juldyzynda tynbaı jaýǵan nóser men qatty soqqan daýyldan keıin О́zbekstandaǵy Sardoba sý qoımasynyń bógeti buzylyp, sonyń saldarynan Túrkistan oblysyndaǵy Maqtaaral aýdanynyń birneshe eldi mekeni sý astynda qalyp, jergilikti turǵyndar zardap shekken bolatyn.
Qaraǵandy oblysy