«Qazaqstannyń makroekonomıkalyq ımmýnıteti» analıtıkalyq zertteýiniń avtorlary Qazaqstanda bıznesti tirkeý prosesin bankterde arnaıy shottar ashý arqyly engizýdi usynyp otyr. О́tken jyly Álemdik ekonomıka jáne saıasat ınstıtýty, Ǵylymı-konsaltıngtik ortalyq (CRC), TALAP qoldanbaly ǵylymı-zertteý ortalyǵy bıznestiń IJО́-degi úlesi, kóleńkeden shyǵarý múmkindikteri týraly zertteý jumystaryn júrgizgen bolatyn. Sonyń nátıjesi keshe belgili boldy.
Sarapshylardyń usynystarynyń biri - eldegi bıznesti tirkeýdi barynsha jeńildetý. Bul faktor ShOB-ty kóleńkeli ekonomıkadan shyǵýǵa jáne óz qyzmetin zańdastyrýǵa yntalandyrady. Zertteýde kórsetilgendeı, qazaqstandyq kásipkerlerdiń zańdy tulǵalardy durys tirkeýdi jáne kirister týraly málimdeme jasaǵysy kelmeýiniń bir sebebi - ákimshilik rásimderdiń kúrdeliligi. Arnaıy shotty tirkegen jeke kásipkerdiń atynan salyqtyq esepteýler boıynsha barlyq operasııalardy banktiń ózi esep ıesiniń jáne salyq komıtetiniń mindettemelerdiń oryndalýy týraly avtomatty túrde qalyptastyrý jáne salyq deklarasııasyn berý arqyly habarlama men rastaý arqyly júzege asyra alady.
Bul rejimge kásipkerlerdiń qyzyǵýshylyǵyn arttyrý úshin memleket qarjylyq jáne ákimshilik jaǵynan da jeńildikter usyna alady. «Mundaı esepshotty ashqannan bastap birinshi jyl ishinde memleket kásipkerdiń mindetti medısınalyq saqtandyrý tólemderin, ózin-ózi jumyspen qamtyǵandary úshin biryńǵaı áleýmettik tólemdi tóleı alady nemese saýda oryndary men tirkeýshilerge oqytý úshin jeńildikter bere alady. Bank sonymen qatar olarǵa «Damý» kásipkerlikti damytý qory» AQ kepildigimen nesıe bere alady. Sonymen qatar, jeke kásipkerdiń ekonomıkalyq jáne qarjylyq tártibi týraly málimetter kásipkerdiń nesıelik qabiletin baǵalaýǵa múmkindik beredi», delingen zertteýde.
Sarapshylar banktik baqylaý shottaryn engizý salyq jınaý kólemin arttyrady, kóleńkeli ekonomıkanyń úlesin azaıtady jáne salyq tóleýshiler úshin salyq tóleý prosesterin jeńildetedi dep úmittenip otyr.