Tótenshe jaǵdaıǵa baılanysty elimizde barlyq saltanatty sharalarǵa shekteý qoıylǵany belgili. Osydan da indetke qarsy kúreste aldyńǵy shepte júrgen polıseılerdi marapattaý bul joly basqasha formatta ótti.
Eńbegi elengen qyzmetkerlerdi marapattaý úshin tosqaýyl beketine oblystyq Polısııa departamentiniń bastyǵy, polısııa polkovnıgi Sultan Bektóre bardy. Qazaqstan Respýblıkasy Tuńǵysh Prezıdenti saıabaǵynda ornalasqan bekette mereke kúnderi qyzmet ótkerip júrgen tártip saqshylaryna marapat pen shen tabystady.
Bektóre Jeńisbaıuly qyzmetkerlerdi merekelermen quttyqtap, antyna adal, sertine berik qyzmetkerlerdiń otbastaryna amandyq, jumystaryna tabys tiledi. Ardagerler keńesiniń tóraǵasy, departament bastyǵynyń keńesshisi Serikbol Tuńǵyshbaı da qoǵam tynyshtyǵyn kúzetkenderge jyly lebizin arnady.
Bıyl Ishki ister mınıstriniń buıryǵymen 9 polıseı marapattalyp, 2 qyzmetker merziminen buryn maıor shenin aldy. Sonymen qatar, departament bastyǵynyń buıryǵymen 25 qyzmetker men 18 ardager marapattaldy.