Jalpy, búginde Taraz qalasynda 33 Uly Otan soǵysynyń ardageri bar eken. Ardagerlerdiń árqaısysyna Qazaqstan Respýblıkasynyń Prezıdenti Qasym-Jomart Toqaevtyń qoly qoıylǵan Quttyqtaý hat pen 1 mıllıon teńgeniń sertıfıkaty jáne merekelik syılyqtar tabystaldy.
Uly Jeńistiń 75 jyldyǵyna oraı búgin Taraz qalasynyń ákimi Aıtqazy Qarabalaev qala turǵyny, Uly Otan soǵysynyń ardageri Mútálip Erejepbaevtyń shańyraǵyna baryp, qart maıdangerdi Jeńis merekesimen quttyqtady. Aıtqazy Qarabalaev búginde 95 jasqa kelip otyrǵan qarııaǵa oblys ákimi Berdibek Saparbaevtyń merekelik ystyq lebizin jetkizip, laıyqty qurmet kórsetti. «Talas aýdanynan 1944 jyly ásker qataryna shaqyrylyp, Uly Jeńisten soń áıgili Brest qamalyn qalpyna keltirýge qatystym. Elge oralǵan soń Talas aýdandyq «Lenın joly» gazetinde alǵash jaýapty hatshy, keıinnen redaktor bolyp qyzmet atqardym.
Talas aýdanynyń Qurmetti azamaty atandym. «Ataqonys», «О́leńim – ómirim» jáne taǵy da basqa kitaptarym jaryq kórdi. Aýdannyń, oblystyń damýy men gúldenýine kezinde óz úlesimdi qostym», degen ardager aqyn Mútálip Erejepbaev jınalǵandarǵa óziniń jazǵan óleńin oqyp berdi. Sondaı-aq, ózine kórsetilgen qurmetke rızashylyǵyn bildirip, avtorlyq kitabyn qala ákimi Aıtqazy Qarabalaevqa syılady.
Jambyl oblysy