«Aıala» qaıyrymdylyq qory soǵys ardagerlerine 2010 jyldan beri kómektesip keledi. Sol kezde tehnıka, múgedekter arbasy jáne qarjylaı qoldaý túrindegi kómekti 20 adam alsa, 2015 jyly osy saýapty iske Samsung kompanııasy da qosyldy.
Atalmysh qor qazirgi kezde 40 ardagerge aı saıyn azyq-túlik pen dári-dármek tasyp, karantın kúnderin jeńildetýge umtylyp otyr. Jýyrda 40 ardagerdiń árqaısysyn aı saıyn 30 myń teńge mólsherinde kómekpen qamtamasyz etý jóninde sheshim qabyldandy.
Osy oraıda ardagerler ne satyp alý kerektigin ózderi anyqtaıdy jáne muny joba úılestirýshilerine habarlaıdy. Bireýge tek azyq-túlik qajet, basqasyna – turmystyq tehnıka: shańsorǵysh, qysqa tolqyndy pesh, útik jáne t.b. kerek. Klınıng qyzmetine de suranys bolyp turady. Barlyq suranystar arnaıy bazaǵa engiziledi jáne osy jalpy aqparattyń negizinde búkil qajetti taýarlar satyp alynady jáne mekenjaılaryna jetkizip beriledi.
«Uly Otan soǵysynyń ardagerlerine degen úlken yqylasymyz ben qurmetimiz mol, olarǵa tıimdi kómek kórsetýge tyrysamyz. Biz ardagerlermen belsendi jumys istegen sońǵy 5 jylda olardyń qatarynyń kúrt azaıyp bara jatqanyn baıqadyq. Bıyl Uly Jeńistiń 75 jyldyǵy, sondyqtan bizdiń de kómegimiz tıip, ár ardager ómirin jaqsartqymyz keledi», – deıdi osy iske uıytqy bolyp júrgen Samsung Electronics Central Eurasia kompanııasynyń jurtshylyqpen baılanys jáne korporatıvtik-áleýmettik jaýapkershilik jónindegi menedjeri Berik Omarov.
Atalǵan joba qamqorlyq jasaıtyn jasy eń úlken soǵys ardageri 9 mamyrda 102 jasqa keledi. Bul – Ádish Ábdiraıymov. Ol kisi 1918 jyly ómirge kelgen. 1938 jyly Harkov farmasevtıkalyq ınstıtýtyna oqýǵa túsip, 1941 jyly Ońtústik-Shyǵys maıdandaǵy 173-shi atqyshtar dıvızııasyna jiberildi. Bergedorfta tuqynda jáne Noıengammdegi konslagerde bolyp, Ádish Ábdiraıymov úıine 1947 jyly oralady. 1952 jyly ol Tashkenttegi Orta Azııalyq memlekettik ýnıversıtetti «Bıolog» mamandyǵy boıynsha bitirgennen keıin Synaq stansasynda zerthana meńgerýshisi bolyp qyzmet atqaryp, odan keıin qazirgi Túrkistan oblysy, Maqtaaral aýdanyndaǵy maqtanyń jańa sortyn ósirgen eken.
ALMATY