Jeńis kúnine arnap «Abylaı han rezıdensııasy» mýzeı kesheni onlaın ekskýrsııalar uıymdastyrdy. Internet arqyly barlyq áleýmettik jelilerge shyǵyp, onda II Dúnıejúzilik soǵysqa qatysqan soltústikqazaqstandyq maıdangerler týraly mol maǵlumattar berilgen. Qazir Soltústik Qazaqstanda kózi tiri 52 maıdanger qalǵan eken, kórmede olar týraly da derekter kórsetilgen.
Jalpy, karantın rejimi kezinde mýzeıdegi onlaın ekskýrsııalar únemi jalǵasyp otyrǵan. Olardyń barlyq sany 25-ke jetken. Ony barlyǵy 5 myńdaı adam tamashalaǵan. Mýzeı dırektory Aıan Sadaevtyń aıtýyna qaraǵanda: «Jeńis kúnine arnalǵan kórmeniń aty: «Er esimi – el esinde» dep atalady. Ol oblystyq Mádenıet basqarmasynyń qoldaýymen jasalǵan. Onda jalǵyz Soltústik Qazaqstan oblysy ǵana emes, jalpy elimizdiń soǵys jyldaryndaǵy erlikterinen, Tyldaǵy janqııarlyq eńbekterden derekter aıtylady».
Ekskýrsııa júrgizýshi Nazgúl Beısembına soltústikqazaqstandyqtar arasynan 55 adam Keńes odaǵynyń batyry ataǵyn alǵanyn, al 11 adam jaýyngerlik «Dańq ordeniniń» úsh dárejesin tolyq alǵanyn aıtty. «Demek, sońǵylar da Batyr ataǵyna teńestirilgender. Sonda bizden barlyǵy 66 adam Batyr ataǵyn alǵan eken. Bul jastarymyzdyń patrıottyq rýhyn kóterýge úlken úlgi bolary sózsiz. Qazir keıbir mekteptiń oqýshylary Batyrlar týraly tolyq derekter jınaýmen aınalysyp júr», dedi ol.
Jeńis kúnin jaqyndatýǵa úles qosqan jaýyngerlerdiń dańqy 75 jyl ótse de umytylmaıdy. Olardyń erlikteri búgingi urpaqqa ónege ekeni sózsiz. Sonyń bir dáleli jas urpaqtyń Jeńis tarıhyn bilýge degen qushtarlyǵy. Abylaı han rezıdensııasy» mýzeı kesheni bul iste árqashan belsendi qyzmet etýde. II Dúnıejúzik soǵys jaýyngerleriniń qaharmandyǵy urpaqtyń sanasyna Abylaı erligimen sabaqtastyrylyp jatqany da quba qup.
QYZYLJAR