Kez kelgen adamnyń 100-ge tolǵany úlken oqıǵa. Al ol tolarsaqtan saz keship, oq pen ottyń arasynda Eýropanyń qarly, syzdy, sazdy dalasynda qar jamylyp, muz jastanǵan maıdanger bolsa – ol endi dúnıejúzilik bolmasa da TMD aýmaǵynda mańyzy bar oqıǵa ekeni daýsyz. Adam ne degen tózimdi jaratylǵan jan ıesi edi.
Qazir Petropavl qalasynda turatyn Nıkıta Semenov osyny dáleldep, keshe, Jeńistiń 75 jyldyǵyn atap ótkennen bir kún keıin 100 jasqa toldy. Ol uzaq jyldar boıy ishki ister organdarynda qyzmet etken adam eken. Sondyqtan ony quttyqtaýǵa Soltústik Qazaqstan oblystyq polısııa departamentiniń bastyǵy Marat Tólebaev bastaǵan bir top ofıserler keldi.
Bular ózderi ǵana kelip qoımaı polısııa departamentiniń úrmeli orkestri men ánshilerin ala kelip, maıdangerdiń aýlasynda, jarqyraǵan ashyq kúnniń astynda, gúldegen alma aǵashtarynyń baýyrynda shaǵyn konsert te qoıyp berdi. Marat Tólebaev sanıtarlyq normalardy saqtaı otyryp, mereıtoı ıesin quttyqtap, oǵan gúl shoǵy men syılyqtar tapsyrdy. Mundaı aıryqsha quttyqtaýdy buryn-sońdy kórmegen sol kópqabatty úıdiń turǵyndary ózderiniń balkondarynan qarap, maıdangerdi quttyqtaǵan polısııa departamentine rızashylyqtaryn bildirdi.
Maıdan jolyna toqtala ketetin bolsaq, Nıkıta Semenov 1940 jyly Sverdlovsk qalasynan áskerge shaqyrylǵan eken. Ol aldymen Máskeýdi qorǵaýǵa qatysyp, joryq jolyn Batys Ýkraınada, Belarýsııada jalǵastyrǵan. Mergender qataryna alynǵan. Jeńisti 1945 jyldyń 9 mamyrynda Estonııada qarsy alady. «Erligi úshin», «Moskvany qorǵaǵany úshin» jáne taǵy basqa kóptegen medaldarmen nagradtalǵan.
Qyrqynshy jyldardyń sońynda aldymen týǵan jerine kelip, odan keıin Qazaqstanǵa qonys aýdarǵan. Burynǵy Selınograd oblysynyń Astrahan aýdandyq mılısııa bóliminde pasport bóliminiń bastyǵy bolady. Ishki ister organdarynda 20 jyldan astam ýaqyt qyzmet atqarǵan soń kapıtan shenimen qurmetti demalysqa shyqqan.
Polıseılermen birge maıdangerdi «Soltústik Qazaqstan oblysynyń isker áıelderi» QU ókilderi de quttyqtady. Ásirese, konserttiń aıaǵy áserli boldy, ańyzǵa aınalǵan «Proshanıe Slavıankı» marshyna polıseıler sap túzep, izet kórsetip, ardagerdi úıine deıin shyǵaryp saldy.
QYZYLJAR