Karantın rejimi aıaqtalýda, biraq jaman indettiń taralýynyń sharyqtaý shegi áli alda ekenine baılanysty Soltústik Qazaqstan oblysynda qandaı sharalar jasalatyny týraly oblys ákiminiń orynbasary Rýslan Álishev keshe brıfıng berdi.
Ol karantındik rejimniń oblysta tıimdi bolǵanyn atap, turǵyndar arasynda indettiń taramaǵanyn, al ınfeksııaǵa ushyraǵandar oblysqa tek syrttan kelgender arasynan shyqqanyn atap ótti. О́ńirde barlyǵy 36 adamnyń boıynan indet shyqqan. Búgingi tańda ınfeksııalyq ortalyqta 6 adam emdelýde. Árıne, provızorlyq ortalyq pen karantındik stasıonarda áli 80-ge jýyq adam bar. 30 adam tolyq emdelip shyqqan. Qazir oblys indetke ushyraǵandar sany jóninen respýblıkada eń sońǵy orynda.
R.Álishev karantındik rejim aıaqtalǵanymen shekteý sharalarynyń tek kezeń-kezeńmen ózgertiletinine toqtaldy. Sonyń ishinde sulýlyq salondarynyń, barlyq dúkender men bazarlardyń tańǵy saǵat 10-nan keshki saǵat 17-ge deıin ashylatynyn aıtty. «Al kóńil kóteretin saýyq oryndary, restorandar men dámhanalar, qonaqúıler ázirge ashylmaıdy. Olardy ashý sanıtarlyq-epıdemıologııalyq jaǵdaıdyń jaqsara túsýin tosyp, ázirge keıinge qaldyryldy», dedi R.Álishev.
Sonymen birge Rýslan Qanathanuly balalardy jetildirý ortalyqtary jáne t.b. balalardyń uıymdarynyń shekteýli ýaqytqa ashylatynyn aıtty. Al mádenıet nysandary tek 30 adamdyq jıyn kóleminde ǵana jumys isteıdi. Demalys oryndary men skverlerge úsh adamdyq toptyń nemese bir otbasy músheleriniń jınalýyna ruqsat etilgen. Sporttyq komandalardyń da 30 adamdyq toppen jattyǵýlar ótkizýine bolady. Biraq balalardyń jattyǵýlaryna áli de shekteý qoıylǵan. Dinı oryndarǵa da, otbasylyq toı-tomalaqqa jáne t.b. basqa jıyndarǵa toppen jınalýdyń shekteýi sol qalpynda qaldyrylǵan. Monshalar men saýnalar da ázirge jumys istemeıdi.
13 mamyrdan bastap ata-analary jumys isteıtin búldirshinder úshin balabaqshalarda ártúrli jastaǵylardy qamtyǵan kezekshilik toptar ashylady. Al basqa toptar 18 mamyrdan bastap jumys isteıdi. Eń bastysy soltústikqazaqstandyqtar keshki saǵat toǵyzǵa deıin aýlalar men kóshelerde úsh adamdyq toppen nemese otbasymen betperde kıip, erkin tynystap, júre alatyn bolǵan. Sonymen birge qoǵamdyq kólikter de keshki saǵat toǵyz jarymǵa deıin júre bastaıdy. Al shekaradan ótýdiń shekteýleri ózgertilmeıdi. Oǵan shyǵaratyn blok-beketter de saqtalady. Alaıda oblys aýdandary arasyndaǵylar alynyp tastalady.
Soltústik Qazaqstan oblysy