Almatydaǵy Qazaq ulttyq qyzdar pedagogıkalyq ýnıversıtetiniń bıylǵy túlekterin óz mamandyǵyna saı jumysqa ornalastyrý maqsatynda «Bos jumys oryndary» jármeńkesi ótti.
Ýnıversıtettiń Instagram jelisindegi resmı paraqshasynda uıymdastyrylǵan sharaǵa 800-den astam stýdent pen Almaty jáne Aqtóbe oblystarynyń 32 aýdanyndaǵy bilim berý uıymdarynyń ókilderi qatysty.
Shara barysynda Almaty oblysy Ile, Jambyl, Panfılov aýdandarynyń bilim bólimderiniń mamandary tikeleı baılanysqa shyǵyp, stýdentter saýaldaryna egjeı-tegjeıli jaýap berdi.
Eki saǵattan astam ýaqytqa sozylǵan jármeńkede jalpy sany 400-ge jýyq suraq qoıyldy. Saýaldardyń deni jas mamandarǵa qarastyrylǵan jeńildikter, «Dıplommen – aýylǵa» memlekettik baǵdarlamasy, tapshylyq týdyryp otyrǵan mamandyqtar tóńireginde boldy.
Onlaın jármeńkeni Qyzdar ýnıversıtetiniń Akademııalyq máseleler jónindegi departament dırektory Qymbat Balajanova júrgizip otyrdy. Sondaı-aq sharada ýnıversıtettiń Oqý jáne oqý-ádistemelik jumystar jónindegi prorektory Erkin Jumanqulova sóz sóılep, jármeńke pedagogıkalyq mamandyqtar boıynsha bilim alǵan túlekterdi jumyspen qamtýdyń birden-bir basty tetigi ekendigin aıtty.
– Dástúrli shara otandyq pedagogıkalyq joǵary oqý oryndarynyń biryńǵaı qazaqstandyq bilim berý keńistigin qalyptastyrý, jastardy jumysqa ornalastyrý máselesi boıynsha ortaq dıalog alańyn qurý, olarǵa jumysqa ornalasý múmkindikteri týraly aqparat berý jáne túlekterdi turaqty jumyspen qamtýǵa járdemdesý maqsatynda uıymdastyrylyp otyr. Elbasy Nursultan Nazarbaev «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda joǵary oqý ornynyń tabystylyǵyn baǵalaýdyń basty ólshemi – oqý bitirgen stýdentterdiń jumyspen qamtylýy, jalaqysy joǵary jumysqa ornalasýy ekendigin atap ótti. Osy oraıda pedagogıkalyq mamandyqtar boıynsha bos jumys oryndary jármeńkesi jastar arasynda jumyssyzdyq máselesin ońtaıly sheshýdiń mehanızmi bolyp otyr, búginde, – dedi Erkin Jumanqulova.
Jármeńkede Almaty jáne Aqtóbe oblystarynyń bilim berý mekemelerinde bos jumys oryndarynyń tizimi jarııalanyp, osy baǵytta tolyqqandy aqparat berildi. Máselen, Aqtóbe oblysyna 251 pán muǵalimi qajet bolsa, Almaty oblysyndaǵy bilim berý uıymdarynda 1196 pedagog pen tárbıeshi kerek eken.
– Bos jumys oryndary jármeńkesin uıymdastyrý jas mamandarǵa ǵana emes, sondaı-aq jumys berýshiler úshin de mańyzdy. Túlekter ózderin qyzyqtyratyn bos oryndar týraly málimet alýǵa, al bizder úshin olardyń iskerlik qasıetin baǵalaýǵa múmkindik týdyrady. Osy taqilettes sharalar arqyly túlekterge aqparat bere alamyz. Orta mektepke qyzmetke ornalasqan jas mamanǵa tájirıbesi mol ustazdar baǵyt-baǵdar berip, jumysynyń qyr-syryn tereń meńgerýine árqashan qolushyn kórsetedi. Sondyqtan jastar jumys isteýge degen ynta-yqylas tanytsa, biz óz tarapymyzdan árdaıym qoldaý kórsetýge daıynbyz, – deıdi bilim bólimderiniń ókilderi.
Statıstıkalyq málimetter boıynsha, 2017-2018 oqý jylynda Qazaq ulttyq qyzdar pedagogıkalyq ýnıversıtetin 1548 stýdent támámdap, olardyń 95 paıyzy jumysqa ornalasqan. Byltyrǵy túlekterdiń «eki qolǵa bir kúrek tapqandarynyń» úles salmaǵy da osy kórsetkish shamasynda.