«Balanyń kóńili –dalada» degen... Osy bir támsildi dáleldegisi keldi me, kim bilsin, Mııaly selosynda turatyn 15 jasar jasóspirim úıinen shyǵyp ketip, tórt kún boıy kúndiz dalada «qydyryp», túnde dostarynyń úıine qonyp júripti.
Osynsha kún úıine kelmegen balasy úshin alańdaǵan anasy Qyzylqoǵa aýdandyq polısııa bóliminen kómek surady. Beıbit kúnde ushty-kúıli joǵalǵan jasóspirimdi izdeýge aýdandyq polısııa bóliminiń, okrýgterdegi polısııa bólimsheleriniń jeke quramy jumyldy. Kámeletke tolmaǵan balany jan-jaqty izdestirý úshin top-topqa bólingen saqshylar aýdan aýmaǵyndaǵy aýyl-selolardy túgel tintip, dalalyq joldardy da nazardan tys qaldyrmady.
–Polısııa bóliminiń ýchaskelik polısııa ınspektory, polısııa kapıtany A.Sarsenǵalıev, kámeletke tolmaǵandar isi jónindegi ınspektor, polısııa maıory B.Baıjan, patrýldik polısııa aǵa ınspektory, polısııa kapıtany J.Amanjolov, anyqtaýshy, polısııa leıtenanty O.Elaman, jedel ýákil, polısııa kapıtany Sh.Naýryzǵalıev balany Mııalydan 4-5 km jerdegi dalalyqtaǵy jol boıynan taýyp, anasyna tapsyrdy, dep habarlady polısııa departamentiniń baspasóz qyzmeti.
Joǵalǵan jasóspirimniń anasy –1976 jylǵy azamatshanyń aıtýynsha, ulynyń úıde joǵyna alǵashqyda sonshalyqty mán bermepti. Ulyn atasynyń úıine ketken bolar dep oılaǵanyn jasyrmaıdy. О́ıtkeni, jasóspirim buryn da otbasyndaǵylarǵa aıtpastan, aýdan ortalyǵynan 100 shaqyrym jerde ornalasqan Qarabaý eldi mekenindegi atasynyń úıine jıi ketip júripti.
–Bul joly da solaı bolar dep oıladym. Biraq, Qarabaýdaǵylarǵa telefon shalǵanda, onyń kelmegenin bildim. Barýy múmkin-aý degen boljammen, barlyq týǵan-týystardan surastyryp, tórt kún boıy izdestirdim. Amalym taýsylǵasyn, polısııanyń kómegine júgindim, deıdi tórt kúnnen keıin tabylǵan jasóspirimniń anasy.
Iývenaldy polısııa tobynyń ınspektorlary men arnaıy psıholog-mamandar balamen sóılesip, dárigerler onyń densaýlyǵyn, dene jaraqattarynyń bar-joǵyn tekserdi. Al, polıseıler jasóspirimniń ata-anasymen túsindirý jumysyn júrgizdi.
Al, joǵalyp-tabylǵan balanyń aıtýynsha, úıinen shyǵarda jyly kıimin, arqaǵa asatyn sómkesine azyq-túlik salyp alypty. Kúndiz dalada «qydyryp», túnde tanys dostarynyń úıine qonypty.
Sonda bul bala kúndiz dalada ne izdep júrdi eken?