Qyzyljardyń «Bereke» móltek aýdanynda qyzmettik sharýalarymen júrgen qalalyq ákimdiktiń qyzmetkerleri Dosulan Bosynov pen Natalıa Derova 14 mamyr kúni Kalının kóshesiniń boıyndaǵy jekemenshik úılerdiń birinen shyǵyp jatqan jalyndy kózderi shalyp qalady.
О́zderiniń adamdar aldyndaǵy jaýapkershiliginen aınymaǵan adal qyzmetkerler mashınalaryn dereý órtenip jatqan úıge burady. Olar órt sóndirýshiler jetkenshe adamdar ot qushaǵynda qalyp qoıýy múmkin ekendigin birden joryǵan edi. Jolda kele jatyp «101» nómirine dabyl da túsirip úlgeredi.
Bular jetkende tilsiz jaý kúsh alyp, úıdiń ishi jalyn qushaǵyna oranǵan. Dosulan úıde adam baryn sezip, esikti buzyp kirýdiń qamyna shuǵyl kirisedi. Natalıa oǵan bolysyp, shynyny syndyratyn qarý izdep tabady. Úıge kirgen qutqarýshylar onda jas qyzdyń otyrǵanyn kóredi. Esi shyǵyp ketken 11 jasar bala bulardyń shaqyrǵanyna kelmeı, ana jaqta atasy baryn aıtyp, aıǵaılap, sony qutqarý kerek deı beredi. Biraq ol jaqqa ótý múmkin emes edi. Jalyn ábden kúsh alyp, lapyldap jatqan. Sonda da kirmek bolǵan Dosulandy qaıta shyǵa almasyn kórgen Natalıa ustap qalady. Ekeýi 11 jasar Ksenııany qolynan tartyp, synǵan terezeden kúshpen shyǵaryp alady.
Bul órtte ókinishke oraı 63 jastaǵy úı ıesi qaza boldy. Al ákimdik qyzmetkerleri 11 jasar qyzdy sabyrǵa keltirip, kórshileriniń qolyna tapsyrady. Osy ýaqytta órt sóndirýshiler men dárigerler de jetedi. О́rt sóndirýge jedel kirisken №5 órt sóndirý bóliminiń qyzmetkerleri ony jarty saǵatta sóndirip úlgeredi. Sonyń ózinde órt 120 sharshy metrdeı jerdi sharpyǵan.
Petropavl ákimdiginiń ókilderi Dosulan Bosynov pen Natalıa Derova ózderiniń memlekettik qyzmetkerge laıyq mindetin adal atqaryp, bir adamdy ajaldan alyp qaldy. 32 jastaǵy Dosulan Túrkistan óńiriniń týmasy, Qyzyljarda ýnıversıtet bitirgen soń osynda qyzmetke qalǵan. Qazir ákimdiktiń bólim bastyǵynyń mindetin atqarady. Al Natalıa órt sóndirýshiniń otbasynda týǵan qyz eken. Keıin jedel járdem qyzmetinde de istepti. Sondyqtan ol adamdarǵa kómektesýge jasynan beıil jan eken. Ákimdik qyzmetkerleriniń isine barlyq qalalyqtar rızashylyǵyn bildirýde.
QYZYLJAR