Iаsnaıa Polıana Tolstoı úıiniń sımvoldyq mánine toqtalyp, kórermenge avtor ómirinde asa mańyzdy bolǵan zattardyń maǵynasyn ashyp berdi. Sondaı-aq oqyrmandar arasynda Tolstoı aqsaqaldyń hattary men personajdaryna test uıymdastardy. Aıta keteıik, bunyń bári «Mýzeı túni» jobasynyń aıasynda hám onlaın rejimde ótkizilip otyr.
«Iаsnaıa Polıana» mýzeı-úıi jasaǵan eki onlaın sharaǵa toqtalsaq, «Iаsnaıa Polıananyń sımvoldary» atty mýltımedııalyq jobada uly jazýshynyń dúnıetanymyna qatysty hám otbasy men úıine baılanysty jeti obekt alynǵan. Onyń árqaısysy erekshe sımvolıkalyq maǵynaǵa ıe. Máselen, Tolstoı úıi – ómirdiń sımvoly, qalamger kabınetindegi dıvan – tektiń sımvoly, Lev Nıkolaevıchtiń qaryndasy syılaǵan jastyq – mahabbat sımvoly, jazýshy úıinde ósken aǵash – meıirim sımvoly, Tolstoı kitaphanasyndaǵy ekperanto tilindegi kitaptar – halyqtar birligi sımvoly, Tomas Edıson syıǵa tartqan fonograf – progress sımvoly, úı alańyndaǵy úlken saǵat – ýaqyt sımvoly.
Al Tolstoı hattarynan test uıymdastyrylǵan ekinshi jobada oqyrman avtordyń ózi jazǵan hattar men keıipkerleri jazǵan hattardy ajyratady. Uly jazýshy bar ǵumyrynda 10 000-nan asa hat jazyp, 50 000-ǵa jýyq jaýap hattar alǵan. Tolstoıdyń jazysqan hattary shyǵarmalarynyń 90 tomdyq jınaǵynyń 30 paıyzyn quraıdy. Qazirgideı tehnologııa oza damymaı turǵan sol ýaqyttarda hat almasý shalǵaıdaǵy tvorchestvo ıeleriniń syr shertisip, pikirlesýlerine úlken múmkindik týǵyzdy. Al búginde qolmen jazylatyn qaǵaz-hattar adamdardyń bir-birine degen seniminiń, saǵynyshynyń sımvolyna aınalǵan sekildi.