Soltústik Qazaqstan polıseıleri kólikti masań kúıde júrgizgeni úshin kózdelgen jaýapkershiliktiń qatańdatylǵanyna qaramastan, mashınalaryn masań kúıde júrgizetinderdiń kóbeıip jatqanyna tań qalýda. Atalǵan faktilerdi anyqtaý jáne jolyn kesý – jergilikti polısııa qyzmeti jumysyndaǵy mańyzdy baǵyttardyń biri bolyp tabylady.
Osyndaı faktiniń biri «Mamlıýtka» blok-beketinde tótenshe jaǵdaı rejiminiń toqtatylýyna bir kún qalǵanda anyqtaldy. Ol «Audi-100» avtokóliginiń 38 jasar júrgizýshisi edi. Medısınalyq kýálendirý onyń masań kúıde bolǵanyn kórsetti. Budan bólek, júrgizýshide blok-beketten ótýge ruqsat bolmaǵan, júrgizýshi kýáligin de almaǵan. Sondaı-aq, onyń buryn da kólikti masań kúıde basqarý quqyǵynsyz júrgizgeni úshin jaýapqa tartylǵany belgili boldy. Tártip saqshylary Ákimshilik quqyq buzýshylyq týraly kodekstiń «Júrgizýshiniń kólik quralyn alkogoldik, esirtkilik jáne (nemese) ýytqumarlyq masań kúıde basqarýy, sol sııaqty kólik quralyn alkogoldik, esirtkilik jáne (nemese) ýytqumarlyq masań kúıdegi adamnyń basqarýy» týraly baby boıynsha hattama toltyrdy. 14 mamyr kúni sot sheshimimen oǵan 30 táýlikke ákimshilik qamaqqa alý jazasy taǵaıyndaldy. Jazasyn ótegennen keıin buzýshy sot aldyna qaıta barady. О́ıtkeni, polıseıler oǵan qarsy Ákimshilik quqyq buzýshylyq týraly kodekstiń «Tótenshe jaǵdaı rejimin buzý» boıynsha materıal jınady.
«Masań kúıde rólge otyrǵan júrgizýshi ózine jáne aınalasyndaǵy adamdardyń densaýlyǵy men ómirine qaýip tóndiredi»,- deıdi SQO Polısııa departamenti Jergilikti polısııa qyzmeti basqarmasynyń bastyǵy polısııa podpolkovnıgi Aıdyn Baımatov. –« Jyl basynan oblys joldarynda ashy sý iship alyp rólge otyrǵan júrgizýshilerdiń kesirinen 6 jol-kólik oqıǵasy oryn aldy, 7 adam jaraqat alyp, 3-ýi qaıtys boldy. Kólikti masań kúıde júrgizgeni úshin 261 soltústikqazaqstandyq jaýapqa tartyldy».
Soltústik Qazaqstan oblysy