Prezıdent Qasym-Jomart Toqaev Tótenshe jaǵdaı jónindegi memlekettik komıssııanyń otyrysy barysynda birqatar daǵdarysqa qarsy sharalar týraly jarııalady.
Azamattardyń qoljetimdi baspana alý múmkindikterin keńeıtýge erekshe nazar aýdaryldy. Osy maqsatqa jetý úshin memleket birqatar júıeli sharalardy qabyldaıdy.
Sarapshy-ekonomıst Jaras Ahmetov áleýmettik qoldaý retinde «5-10-20» baǵdarlamasy engizilgenin, bul shara turǵyn úı máselesin sheshýge kómekteskenin aıtady. «Osy baǵdarlama aıasynda 390 mlrd teńge bólý josparlanǵan. Ekinshiden, «Turǵynúıqurylysjınaqbanki» platformasynda turǵyn úıdi bólý prosesterin júıeleý maqsatynda azamattardyń ómir súrý jaǵdaılaryn jaqsartý jónindegi jumysty kúsheıtetin jańa mekeme - «Otbasy banki» qurylady. Úshinshiden, turǵyndardyń zeınetaqy jınaqtarynyń bir bóligin turǵyn úı satyp alý úshin paıdalaný tetikterin ázirleý josparlanýda» deıdi Jaras Ahmetov.
Bul turǵyda sarapshy zeınetaqy júıesin salymshylardyń qarajatty paıdalanýdyń sıngapýrlyq tájirıbesine nazar aýdarý qajettigin aıtady. «Sıngapýrlyq zeınetaqy júıesiniń basty quryltaıshysy Ortalyq Jınaqtaýshy Qor – halyqtyń zeınetaqyǵa, turǵyn úıge jáne medısınalyq qyzmetke degen qajettilikterin qanaǵattandyrýǵa múmkindik beredi. Osy modelge sáıkes qyzmetkerler men jumys berýshiler aı saıyn qyzmetkerdiń zeınetaqy shotyna birlesken jarnalar engizedi. Keıinnen jınaqtalǵan qarajatty turǵyn úı satyp alýǵa, oqý aqysyn tóleýge, medısınalyq shyǵyndardy jabýǵa jáne basqa maqsattarǵa paıdalanýǵa bolady» deıdi sarapshy.
Zeınetaqy jınaqtaryn paıdalanýdyń uqsas ádisin Qazaqstanda da beıimdeýge bolady. Aıta ketý kerek, búgingi tańda 10,69 mıllıon azamat Qazaqstannyń zeınetaqy júıesine ınvestorlar bolyp tabylady. «Qazaqstannyń zeınetaqy jınaqtary 11 trln teńgeden asady. Halyqtyń zeınetaqy jınaqtarynyń bir bóligin paıdalaný tetikterin engizý qazaqstandyqtardyń memlekettik turǵyn úı baǵdarlamalaryna qatysý múmkindikterin keńeıtedi» deıdi J. Ahmetov.
Sarapshy osy rette qazaqstandyqtardyń jınaqtaryn basqarýǵa ruqsat berý azamattardyń beıresmı sektordan ketýine jáne jınaqtaýshy zeınetaqy júıesine enýine qosymsha yntalandyrýǵa múmkindik beretinin aıtady. «Osy basymdyqtarǵa qol jetkizý úshin Qazaqstan úkimeti memleket basshysynyń tapsyrmasy boıynsha azamattardyń zeınetaqy jınaqtaryn 2020 jyldyń 1 shildesine deıin paıdalanýdyń naqty tetikterin ázirleýi kerek» deıdi Jaras Ahmetov.