Atalmysh baǵdarlama boıynsha aımaqta bıyl barlyǵy 275 jobany júzege asyrý josparlanǵan. Jumyspen qamtýdy úılestirý jáne áleýmettik baǵdarlamalar basqarmasynyń basshysy Gúlnar Ábenovanyń aıtýynsha, búginge deıin 263 joba boıynsha memlekettik satyp alý konkýrsy jarııalanǵan. Onyń 210-yna kelisimshart jasalypty. Aımaqta qazirdiń ózinde 99 joba júzege asyryla bastady.
«Jumyspen qamtýdyń jol kartasy» eń aldymen jumyssyz azamattardy eńbekpen qamtamasyz etýge, jumyssyzdyqtyń ósýine jol bermeýge baǵyttalǵanyn eskersek, mańyzdy máselelerdiń biri jańa jumys oryndaryn qurý bolyp tabylady. Oblysta jumys oryndaryn qurý monıtorıngi «Jumys oryndaryn qurýdyń ıntegrasııalanǵan kartasy» aqparattyq júıesi arqyly júzege asyrylatyn bolady» - dedi Gúlnar Ábenova.
Búginge deıin aımaqta 1049 jańa jumys orny ashylyp, oǵan jumyspen qamtý ortalyqtary boıynsha 576 adam jumysqa ornalastyrylǵan. Jalpy baǵdarlama aıasynda 13,5 myń jumys ornyn ashý josparlanýda.
«Iske asyrylyp jatqan jobalar aıasynda 7 myńǵa jýyq adam jumyspen qamtylady. Qazir aımaqta 4 myń jumyssyz tirkeýde tur. Degenmen jumysqa úmitkerlerdi irikteý kezinde kolledj túlekterine basymdyq berý qajet» - dedi basqarma basshysy.
Bıyl oblysta tehnıkalyq jáne kásiptik bilim berý uıymdaryn 6,7 myń shákirt bitirip shyǵady.
Jıyn barysynda áleýmettik qorǵaý salasynda júzege asyrylyp jatqan jobalar týraly sóz boldy. «Jumyspen qamtýdyń jol kartasy» aıasynda bul salada jalpy somasy 266 mln teńge bolatyn 4 joba júzege asyrylyp jatyr. Nátıjesinde 75 jumys orny ashylyp, 37 adam jumysqa ornalasady.
Qostanaı oblysy