Attestat tapsyrý oqý oryndarynyń aýlalarynda ótedi. Odan keıin túlekter mektep jyldary týraly estelik retinde aǵash otyrǵyzady. Bul týraly Nur-Sultan qalasy ákimdiginiń resmı saıty habarlady.
«2019-2020 oqý jylynyń qorytyndysy boıynsha 6 515 elordalyq oqýshy attestat alady. Saltanatty rásim 3 maýsymda qalanyń barlyq orta oqý oryndarynda ótedi. Elordada karantın rejıminiń saqtalýyna baılanysty atalǵan is-sharalar barlyq sanıtarlyq normalardy saqtaı otyryp, mektep aýlalarynda ótedi. Oqýshylar rásimge mektep formasymen qatysady. Attestat tapsyrǵannan keıin «túlekter alleıasynda» kóshet otyrǵyzý aksııasy josparlanǵan. Nur-Sultan qalalyq bilim basqarmasy bitirý keshterin ótkizýge qatań tyıym salynatyndyǵyn eskertedi», – dedi qalalyq bilim basqarmasynyń baspasóz hatshysy Altynaı Zarlyqqyzy.
Bıyl 6 199 elordalyq oqýshy nemese oqýshylardyń jalpy sanynyń 95%-y ulttyq biryńǵaı test (UBT) tapsyrady. Onyń ishinde 3 665 qazaq, 2 495 orys, 39 aǵylshyn tilinde. Bul rette UBT ótkizý formaty ózgerissiz qalady: uzaqtyǵy 3 saǵat 50 mınýt test eki bloktan – 3 negizgi pán (20 tapsyrma) jáne 2 beıindik pánnen (30 tapsyrma) turady. UBT-ǵa 11-shi synyptyń tórtinshi toqsanynyń tapsyrmalary engizilmeıdi.
Karantın rejımin eskere otyryp, test bastalar aldynda emtıhan tapsyrýshylardyń temperatýrasy ólshenip, oqýshylar arasynda qaýipsiz qashyqtyq saqtalady. Sondaı-aq qosymsha sanıtarlyq sharalar qabyldanady.
Budan basqa oqýshylardy UBT ótetin jerge tegin jetkizý qamtamasyz etiledi. Ata-analar óz balalarynyń ýaqytynda kelýin jáne qaýipsizdigin qamtamasyz etýge mindetti. UBT bastalǵanǵa deıin úı-jaılardyń órtke qarsy qaýipsizdigi tekseriledi, medısınalyq kómek jáne quqyqtyq tártipti qorǵaý uıymdastyrylady. Bıyl «Altyn belgige» 359, úzdik attestatqa 379 túlek úmitker.