Qazirgi kezde elimizdiń shalǵaı aýdandary men iri eldi mekenderinde «Aýyl – el besigi» jobasy aıasynda óreli ózgerister bolyp jatqanyn eshkim de joqqa shyǵara almaıdy. Áıtse de «kórmes –túıeni de kórmes» degendeı, mundaı ómirsheń jobalar men aýqymdy isterdi kórgisi, elegisi kelmeıtin adamdar da joq emes.
El ishinde jaqsylyqtar men jańalyqtar jetkilikti. Onyń oń mysaldary bizdiń Temir aýdanynda da tabylady. Sonyń ishinde básekege qabilettilikti kóteretin naqty jobalar qolǵa alynýda.
Básekege qabiletti el bolýy úshin biz eń aldymen ejelgi tól mádenıetimiz ben salt-dástúrimizdi jáne otanshyldyq sezimdi saqtaı bilýimiz kerek. Munyń bári týǵan jerge degen súıispenshilikten bastaý alady dep bilemin. Aýyldastarymnyń boıynda osyndaı qasıetterdiń toǵysýy meni árkez rızashylyq sezimge bóleıdi.
Aýyl – ulttyq rýhtyń qýat alar qaınar kózi, ulttyń uıytqysy emes pe?! О́rkenıetti elder kóshiniń qatarynda bolýymyz jolynda aýyldyń arqalaıtyn júgi qashan da erekshe.
Budan 2-3 jyl buryn Tuńǵysh Prezıdent – Elbasy Nursultan Nazarbaevtyń bastamasymen qabyldanǵan «Aýyl – el besigi» jobasy barlyq jerdegideı Temir aýdanynda da qyzý qoldaý tapty. Ári atalǵan joba aıasynda ájeptáýir ister qolǵa alyndy. Munda qordalanyp qalǵan basty problemanyń biri – jol qatynasy bolsa, ótken jyly 90 mln teńgege jýyq qarajatqa aýdan ortalyǵy Shubarqudyqtaǵy kóshelerge kúrdeli jóndeý jumystary júrgizildi. Sondaı-aq uzyndyǵy 3 kılometrge jýyq avtomobıl joly salynyp, el ıgiligine paıdalanýǵa berildi.
Aýdan ortalyǵynda buǵan deıin arnaıy oryn bolmaǵandyqtan, kúrespen shuǵyldanýǵa beldi bekem býǵan jastar jattyǵýdy mádenıet úıimen japsarlas ornalasqan bólmede jasap kelgen edi. Al ekinshi kúres zalynyń ornyn halyqqa qyzmet kórsetý ortalyǵyndaǵy kabınetterdiń biri atqardy.
Jergilikti atqarýshy organ jetekshileri men el turǵyndarynyń ózara aýyzbirligi jáne ortaq is-qımyldary nátıjesinde bul másele de «Aýyl – el besigi» jobasy sheńberinde sheshimin taýypty. Sóıtip «Qyzyljar» dep atalatyn shaǵyn aýdanda deneshynyqtyrý jáne saýyqtyrý kesheniniń qurylys jumystary bastaldy. Bıylǵy jyldyń basynda oǵan respýblıkalyq jáne oblystyq bıýdjetten taǵy da qosymsha 130 mln teńge kóleminde qarajat bólindi. Salamatty ómir saltyn qalyptastyrý men buqaralyq sportty damytý isine úlken septigin tıgizetin kelisti keshenniń jalpy quny 580 mln teńgeni quraıdy. Ony paıdalanýǵa berý bıylǵy jyldyń aıaǵyna belgilengen. Men sanaly ǵumyrymdy qarjy salasyna arnaǵandyqtan da osyndaı naqty derekterdi alǵa tarta sóılegendi janym qalap turady.
Temir aýdanynda budan ózge de atqarylyp júrgen is-sharalar men jobalar barshylyq. Sondyqtan da bul baǵyttaǵy jumystar bas basylym betinde jaryq kórip jatsa, qýanyshty bolar edik.
Muhıt Qabyluly,
qarjy salasynyń ardageri
Aqtóbe oblysy,
Temir aýdany