Memlekettik qyzmet isteri agenttigi árbir azamatqa memlekettik qyzmetterdi jetildirýge jáne qoljetimdi sıfrly memleketti qurýǵa óz úlesin qosýǵa múmkindik beretin «Tyńdaý» biregeı jobasyn iske qosty.
Memleket basshysy óziniń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty halyqqa Joldaýynda «Halyq únine qulaq asatyn memleket» tujyrymdamasy barlyq azamattardyń ótinishterine jedel jáne tıimdi áreket etýge baǵyttalýy tıis ekenin atap ótti. Bul rette, Prezıdent memlekettik apparat qyzmetindegi problemalar kóbinese azamattar men jergilikti jerlerdegi memlekettik qyzmetkerler arasyndaǵy keri baılanystyń bolmaýyna baılanysty ekendigine nazar aýdardy.
«Halyq únine qulaq asatyn memleket» – bul barynsha ashyq jáne esepti memleketti qalyptastyrý. Sondyqtan memlekettik apparat ár sala boıynsha birinshi kezekte halyqtyń pikirin eskerýi tıis.
«Tyńdaý» jobasy erikti-qoldanýshylar pikiri aıasynda qurylǵan. Jobaǵa qatysý úshin elektrondy qyzmetti alý talap etiledi jáne barlyǵyn tyndau.kz saıtyndaǵy onlaın-anketada belgileı otyryp, onyń árbir qadamyn baǵalaý qajet. Agenttik tek memlekettik qyzmetterge shaǵym jınamaıdy. Bizdiń negizgi maqsatymyz – problemalardy anyqtap, tıimdi keri baılanys ornatý. Biz jınaqtalǵan máseleler bazasyna taldaý jasap jáne memlekettik organdarǵa qajetsiz qadamdardy joıý, halyqtyń memlekettik qyzmetterdi alý prosesterin jeńildetý boıynsha naqty usynystar beretin bolamyz.
О́tken aptada biz «Tyńdaý» jobasyn iske qosyp jáne probasııalaý maqsatynda eki qyzmetti tańdap aldyq. Olar – pasport pen jeke kýálikti alý qyzmeti. Qazirgi ýaqytta osy baǵyt boıynsha azamattardan usynystar jınaý jalǵasýda.
Búgin osy joba aıasynda eriktilerdiń ishinen alǵashqy fokýs-top quryldy jáne usynystar jınaý júrgizilýde. Mysaly, «Elektrondyq úkimet» portalynda jumys prosesterin jaqsartý boıynsha avtomatty túrde terý jáne tek JSN-ny tergen kezde azamattyń derekterin (aty-jóni, týǵan jyly men jeri) tartýǵa qol jetkizetin jasandy ıntellekt negizinde arnaıy qosymshalar, júkteletin skanerlengen qujattar men fotosýretterdi (3h4) júıege qajetti formattarǵa avtomatty túrde keltirý úshin túrlendirýge arnalǵan kómekshi qosymshalar boıynsha usynystar ázirlendi.
Sondaı-aq avtomattandyrylǵan qyzmetterdiń jumysqa qabilettiligin testileý, ESQ nemese bir ret qoldanylatyn parol kómegimen avtorızasııalaý nemese qol qoıý kezinde týyndaıtyn aqaýlardy anyqtaý júrgiziledi.
Fokýs-toptyń qatysýshylary usynystaryn «Elektrondyq úkimet» portalyndaǵy, mobıldik nusqasy men telegram-bottaǵy jumystyń beınejazbalary men jumys betteriniń skrınderi túrinde engiziledi.
Aldaǵy ýaqytta elektrondyq qyzmetter boıynsha tıisti materıaldardyń jınalýyna qaraı azamattardyń usynystary múddeli organdarmen birlesip, kórsetiletin qyzmetti alýshylardy habardar ete otyryp, pysyqtalatyn bolady. Biz jaqyn ýaqytta «Tyńdaý» halyqtyń pikirin eskeretin tıimdi joba bolady dep úmittenemiz.
Anar JAIYLǴANOVA,
Memlekettik qyzmet isteri agenttiginiń tóraǵasy