Bıyl eki mekteptiń kelbeti jańasha túrlenbek. Sonyń biri Kazgorodok orta mektebi. Bul kúni bilim oshaǵyna kúrdeli jóndeý jumystary bastalyp ketti.
Qazgorodok orta mektebiniń irgetasy 1979 jyly qalanǵan. Sodan beri mektep ishinde kishigirim jóndeý júrgizilgenimen, dál osyndaı kúrdeli jóndeý jumysy birinshi ret jasalyp otyr. Jóndeý jumystaryna oblystyq qazynadan 285 mln teńge qarastyrylǵan. Bul kúni qurylysqa 20-ǵa jýyq adam men arnaıy tehnıka jumyldyrylǵan.
– Qazirgi ýaqytta montajdaý jumystarynyń jartysy aıaqtaldy. Sondaı-aq ǵımarattyń syrtyn da qyryp, tazartyp, áktep jatyrmyz. Endigi aptadan bastap ishki árleý jumystary bastalady. Nysandy 15 tamyzda tapsyramyz. Barlyǵy jospar boıynsha júzege asýda, – deıdi qurylys ýchaskesiniń jetekshisi Oljas Qabdollov.
Bilim oshaǵynda 204 shákirt bilim alady. Kúrdeli jóndeýden keıin mektep ishi jańa jıhazdarmen tolyqtyrylyp, kompıýterlermen de jabdyqtalmaq.
– «Aýyl – el besigi» jobasy aıasynda mektepke kúrdeli jóndeý jumystary júrgizilýde. Kabınetterdiń ishi keńeıtilip jatyr. Mekteptiń aldyna da abattandyrý jumystary júrgizilýde, – deıdi Kazgorodok orta mektebiniń dırektory Alma Bekenova.
Kazgorodok mektebinen bólek aýdandaǵy Abaı aýylyndaǵy bilim ordasyna osyndaı kúrdeli jóndeý jumystary jasalmaq. Aldaǵy aılarda qurylys jumystary bastalady.
Aqmola oblysy