Koronavırýs pandemııasynan týrıstik bıznes kóp zardap shegýde. О́ńirde 700-den astam ujym osy salada jumys isteıdi, sonyń bári indet saldarynan ýaqytsha jabylýǵa májbúr.
Kúni buryn jasalǵan josparlar oryndalmaıtyn túri bar. Sol sebepti qarjy kózi seıildi. Demalys pen týrızm ındýstrııasy – ekonomıka salasynyń eń basty tetikteriniń biri. Oblys jyl saıyn osy saladan 6 mıllıard teńgeden astam kiris taýyp kelgen. Jazǵy mezgilge daıyndalatyn 2 aı, ıaǵnı, sáýir men mamyr aılary tuıaq qybyrlatýǵa múmkindik bermedi.
– Týrıstik sala kóp zardap shekti. Alaıda, densaýlyq qaýipsizdigi birinshi orynda. Mamyr aıyndaǵy Qazaqstan-Reseı ınfotýry ótpeı qaldy. Bul Reseımen birigip atqarylar basty sharalardyń biri edi. Bizdiń týrısterdiń 30 prosenti osy elden keledi, - deıdi oblystyq týrızm jáne demalys qaýymdastyǵynyń tóraǵasy Shynarbek Batyrhanov.
Oblystyń bas sanıtarlyq dárigeriniń málimdeýine qaraǵanda, 25 mamyrǵa deıin óńir ahýaly jiti baqylaýǵa alynǵan. Eger indet seıilse, týrızm nysandary ashyla bastaıdy. Onyń ózinde qaýipsizdik sharalary qatań saqtalýy tıis.
Qaýipsizdik talaptaryn barynsha saqtaý bólek másele deıdi qonaq úı qyzmetkerleri. Búgingi kúni olar tabys kózi men baǵa saıasatyna qanshalyqty áser etetindigi jaıly tolǵanys ústinde. Sondyqtan memleket tarapynan týrızm salasyna qandaı da bir qoldaý bolaryna úmitti.