Atyraý oblysynyń ákimi Mahambet Dosmuhambetov Teńiz kenishindegi ahýalmen tanysyp, shuǵyl jıyn ótkizdi.
– Atyraý oblysynda jaǵdaı turaqtanǵanymen, Teńiz kenishindegi ahýal áli de alańdatyp otyr, - dep málim etti aımaq basshysy Mahambet Dosmuhambetov. – Qazirgi kezde Teńiz kenishinde ornalasqan 25 jataqhanada turatyn 42 mekemeniń 709 jumysshysynan COVID-19 ınfeksııasy anyqtaldy. 20 mamyrdaǵy málimet boıynsha, 615 naýqastyń 594-i stasıonarǵa jatqyzyldy. Jaǵdaı áli de kúrdeli kúıinde qalyp otyr.
Jıyn barysynda oblys ákimdigi tarapynan qurylǵan arnaıy shtabtyń atqarýshy basshysy Aslan Bekjanov, Jylyoı aýdanynyń bas sanıtarlyq dárigeri Talǵat Habıbýllın, Densaýlyq saqtaý mınıstrligi komıtet tóraǵasynyń orynbasary Nurhan Sádýaqasov, «Teńizshevroıl» JShS óndiris operasııalary jónindegi menedjeri Garrı Enk qalyptasqan jaǵdaı týraly baıandady.
Jıyndy qorytyndylǵan oblys ákimi Mahambet Dosmuhambetov Teńiz qalashyǵyndaǵy oblystyq shtab fılıaly men «Teńizshevroıl» kompanııasynyń basshylaryna naqty tapsyrmalar berdi. Atap aıtqanda, karantınge jabylǵan vahtalyq qalashyqtarǵa qatań baqylaý jasaý, sanıtarlyq-dezınfeksııalyq rejımdi baqylaý, túsindirme jumystaryn barynsha arttyrý, provızorlyq stasıonardy medısınalyq mamandarmen qamtamasyz etýdi jedeldetý bar.
Sondaı-aq «Teńizshevroıl» kompanııasyna merdiger mekemelermen birlese jumys merzimi aıaqtalǵan qyzmetkerlerdi Teńiz kenishinen kelisilgen talaptarǵa sáıkes shyǵarý josparyn ázirleýdi júktedi.