Shoqan Ýálıhanov atyndaǵy Kókshetaý memlekettik ýnıversıtetinde qazaq halqynyń tuńǵysh aǵartýshy ǵalymy Shoqan Ýálıhanovtyń 185 jyldyǵyna arnalǵan «Shoqan oqýlary-24» halyqaralyq ǵylymı-praktıkalyq konferensııasy onlaın rejımde ótti.
Konferensııaǵa barlyǵy 243 ǵylymı maqala usynylǵan. Barlyq maqalalar elektrondyq formattaǵy konferensııa jınaqtarynda jarııalanyp, avtorlarǵa jiberiletin bolady. Sondaı-aq, bıylǵy jyly barlyq josparlanǵan ǵylymı is-sharalardyń formaty belgili sebepterge baılanysty kúndizgi rejımde qashyqtyqtan ótkiziledi.
Ǵylymı konferensııanyń jumysyna elimizdiń jáne Vengrııa, Monǵolııa, Reseıdiń belgili ǵalymdary qatysyp, óz tájirıbelerimen bólisti. Plenarlyq otyrysta otandyq jáne sheteldik tanymal ǵalymdar baıandama jasady.
Konferensııa barysynda ustazdar men jas ǵalymdar tarapynan baıandamashylarǵa kóptegen suraqtar qoıylyp, olarǵa naqty jaýaptar alyndy. Bul suraqtarda ásirese, Shoqannyń Parıjge sapary, ǵalymnyń Syrymbette dúnıege kelýi, Uly dala halqynyń mádenıeti, Shoqan Ýálıhanov tulǵasyn zerttegen ǵalymdar, Shoqannyń ádebıettanýshy ǵalym ekendigi áli de bolsa tolyq zerttelip, naqty aıtylmaı júrgenine basa nazar aýdaryldy. Bundaı mańyzy zor konferensııalar ǵylymı zertteý jumystaryn odan ári damytýǵa jol ashady.