Ár sektor qajetti quraldarmen jabdyqtalǵan, kelýshiler elektrondyq úkimet portaly men basqa da memlekettik resýrstarǵa kire alady. Mekenjaıyńyzǵa jaqyn ornalasqan sektorlardy 2gis baǵdarlamasy arqyly tabýǵa bolady.
Bul qyzmet túri «Azamattarǵa arnalǵan úkimettiń» Shymkent fılıalynyń, Qazaqstan Respýblıkasy Memlekettik qyzmet isteri agenttiginiń Shymkent qalasyndaǵy Departamenti ókilderiniń jáne 2gis mamandarynyń birlesken jumysynyń arqasynda júzege asty.
Elimizde TJ tártibi alynyp tastalǵaly HQO-da qyzmet kórsetý tártibi ózgerdi.
Búgingi tańda Halyqqa qyzmet kórsetý ortalyqtarynan elektrondyq formatta qoljetimsiz «qaǵaz» qyzmetterdi jáne egov.kz portalynda aldyn ala rásimdelgen daıyn qujattardy ǵana alýǵa bolady. Qazaqstanda memlekettik qyzmetterdiń 80%-dan astamyn elektrondy formatta alýǵa bolady.Olardyń barlyǵy egov.kz portalynda qoljetimdi.
«Endi azamattar memlekettik qyzmetterdi úıden shyqpaı-aq nemese HQO ǵımarattarynan ózge ákimdikter janyndaǵy front - keńselerde, oqý oryndarynda jáne medısınalyq uıymdarda ornalasatyn ózine-ózi qyzmet kórsetý sektorlarynda óz betinshe alýǵa bolady», - dedi Shymkent qalasy boıynsha «Azamattarǵa arnalǵan úkimet» MK KEAQ fılıalynyń dırektory Danabek Isabekov.
Elektrondyq úkimet buryshtarynda ESQ nemese bir rettik paroldi qoldana otyryp, ártúrli elektrondy anyqtamalardy alýǵa, nekeni tirkeý úshin ótinish berýge, balany balabaqsha kezegine qoıýǵa, zańdy tulǵa retinde memlekettik tirkeýden (qaıta tirkeýden) ótýge, avtokólikti tirkep, júrgizýshi kýáligin aýystyrýǵa, memlekettik bajdy tóleýge jáne taǵy basqa qyzmetterdi alýǵa bolady.
Shymkent