Petropavl qalasy ákimdiginiń avtomobıl joldary bóliminiń bastyǵy Baqyt Ilııasovtyń aıtýyna qaraǵanda, bıyl Qyzyljardyń 75 kóshesi men saıajaılar jáne qorymdarǵa aparatyn joldary jóndelmekshi. Al byltyr 50 kóshe jóndelgen eken. Osy maqsatqa bıýdjetten 704 mln teńge bólingen. Jóndeý jumystarynyń jalpy aýmaǵy 300 myń sharshy metrdy quraıdy. Jóndeletinderdiń qataryna qalanyń qaq ortasyndaǵy M.Jumabaev, M.Gorkıı atyndaǵy eń úlken kósheler de engizilipti.
Maǵjan atyndaǵy magıstraldy kósheniń jóndelgenine kóp bola qoıǵan joq edi, biraq qazirdiń ózinde shuqanaqtary kóbeıip ketken. Onyń ústine bul kósheniń boıyndaǵy jaıaýlar júretin trotýar Abaı qıylysynan ári múlde joq. Aqshasy qoldy bolǵanǵa uqsaıdy. Bıylǵy jóndeýde qala turǵyndary osy másele eskeriler degen úmitte. Jalpy, Maǵjan kóshesi burynǵy «Kommýnıstıcheskıı» atyndaǵy dańǵyldy ıelenip, qalany qaq jaratyn eń úlken kóshelerdiń biri bolǵan edi. Alaıda bir pysyqaı ákimniń tusynda onyń soltústik jartysy Shoqan Ýálıhanovtyń atyna berilgen. Basqa ataýlardy ıelengen júzdegen kóshe turǵanda qazaqtyń eki arysyna bir kósheni bólip berip, máz bolyp ketken ol ákim.
Sonymen birge, bıyl 73 aýlanyń joldary jóndelmekshi. Qala ortalyǵyndaǵy keıbir aýlalar jyldar boıy jóndelmeı, qazan-shuńqyrlary qaptap jatatyn. Endi sondaılarǵa da jóndeý júrgizýdi josparǵa engizgeni qala ákiminiń halyqqa janshyrlyǵyn kórsetip tur. Aýlalardyń joldary ǵana jóndelip qoımaı, beınebaqylaý kameralary da ornatylatyndyǵy kóńilge qýanysh uıalatýda.
Qala turǵyndary qala ákimimen bolǵan kezdesýde M.Jumabaevtan basqa da 16 kóshege trotýarlar salýdy ótingen eken. Bıyǵy jóndeý jumystarynda osy ótinishter de eskerilgen eken.
QYZYLJAR